मुंबई : लालबाग येथील मसाला गल्लीतील रस्त्यावर बेकायदा मसाला विक्री करणाऱ्यांवर शुक्रवारी पालिकेने धडक कारवाई केली. पालिकेच्या ‘एफ-साऊथ’ विभागाने ही कारवाई केल्याचे विभागाच्या सहाय्यक आयुक्त वृषाली इंगळे यांनी सांगितले.
मुंबईतील पदपथांवर, रस्त्यांवर बेकायदा फेरीवाल्यांनी कब्जा केला आहे. मुंबई महापालिकेच्या अतिक्रमण निर्मूलन विभागाने बेकायदा फेरीवाल्यांविरोधात कारवाईचा बडगा उगारण्यास सुरुवात केली आहे. त्याचाच एक भाग म्हणून शुक्रवारी लालबाग मसाला गल्लीतील रस्त्यावर बेकायदा मसाला विक्री करणाऱ्यांवर अतिक्रमण निर्मूलन विभागाने धडक कारवाई केली.
या कारवाईत जप्त करण्यात आलेला माल गोदामात जमा करण्यात आला आहे. यापुढे बेकायदा फेरीवाल्यांविरोधात धडक कारवाई सुरू राहील, असा इशारा वृषाली इंगळे यांनी दिला आहे.
