मुंबई : चर्चगेट-नालासोपारा लोकलच्या फर्स्ट क्लासच्या डब्याचा दरवाजा बंद करण्यावरून झालेल्या वादातून मयंक लोहार या तरुणाची मंगळवारी रात्री हत्या करण्यात आली. या घटनेनंतर रेल्वे पोलिसांनी युध्द पातळीवर तपास मोहीम राबवून आरोपी रोशन सुवर्णा (वय ३०) याला पनवेलमध्ये अटक केली. गेल्या चार महिन्यांतील अशा प्रकारची ही दुसरी घटना आहे.
हत्या प्रकरणातील आरोपी फरार झाल्याने त्याला पकडण्यासाठी रेल्वे पोलिसांनी सहा पथके तैनात केली होती. पोलिसांनी आरोपीच्या वडिलांची सखोल चौकशी केली, त्यानंतर आरोपीचे ठिकाण शोधून त्याला पकडण्यात आले.
मयंक लोहार हे मंगळवार २३ जून रोजी रात्री कामावरून घरी परतत असताना चर्चगेट-नालासोपारा फास्ट लोकलच्या प्रथम श्रेणीच्या डब्यातून प्रवास करत होते. प्रवासादरम्यान पाऊस पडत असल्याने डब्याचा दरवाजा बंद करण्यावरून मयंक आणि आरोपी रोशन यांच्यात वाद झाला. या वादाचे रूपांतर हाणामारीत झाले आणि आरोपीने मयंक यांच्यावर धारदार शस्त्राने वार केले. बोरिवली स्थानकावर प्लॅटफॉर्म क्रमांक ६ वर ट्रेन पूर्णपणे थांबण्यापूर्वीच आरोपी घटनास्थळावरून पळून गेला. गंभीर जखमी अवस्थेतील मयंक यांना रुग्णालयात दाखल करण्यात आले होते, परंतु दुर्दैवाने उपचारादरम्यान त्यांचा मृत्यू झाला.
प्रवाशांच्या सुरक्षेचा प्रश्न पुन्हा ऐरणीवर
लोकल प्रवासात झालेल्या या हिंसक घटनेमुळे मुंबईकर प्रवाशांमध्ये घबराटीचे वातावरण पसरले आहे. गर्दीच्या वेळी आणि रात्रीच्या प्रवासात प्रवाशांची सुरक्षा नेमकी कोणाच्या हातात आहे, असा प्रश्न आता उपस्थित केला जात आहे. या घटनेनंतर रेल्वे पोलीस आणि सुरक्षा यंत्रणा अधिक सतर्क झाल्या असून, लोकल डब्यातील सुरक्षेचे नियम अधिक कडक करण्याच्या सूचना दिल्या आहेत.
तपासाकडे सर्वांचे लक्ष
मुंबई लोकल हत्याकांडाच्या या प्रकरणाने शहरात मोठी खळबळ उडवली आहे. आरोपीच्या अटकेनंतर आता पोलिस तपासातून आणखी कोणते धक्कादायक खुलासे समोर येतात, याकडे सर्वांचे लक्ष लागले आहे. रेल्वे पोलिसांनी नागरिकांना अफवांवर विश्वास न ठेवण्याचे आवाहन करत तपास सुरू असल्याची माहिती दिली आहे. दरम्यान, आरोपी रोशन सुवर्णा याला न्यायालयात हजर करण्यात येणार असून पुढील चौकशीसाठी पोलिस कोठडीची मागणी केली जाण्याची शक्यता आहे. मुंबई लोकलमधील या हत्येचा संपूर्ण तपास पूर्ण होईपर्यंत प्रकरणावर रेल्वे पोलिसांचे बारकाईने लक्ष राहणार आहे.
तांत्रिक तपास आणि सीसीटीव्हीची मदत
हत्येच्या घटनेनंतर रेल्वे पोलिसांनी कसून तपास सुरू केला होता. पोलिसांनी घटनास्थळावरील तसेच रेल्वे स्थानकांवरील सीसीटीव्ही फुटेजची तपासणी केली. तांत्रिक तपासाद्वारे आरोपीची ओळख पटवल्यानंतर, पोलिसांच्या पथकाने मिळालेल्या माहितीनुसार आरोपी रोशन सुवर्णा याला ताब्यात घेतले. चौकशीदरम्यान त्याने गुन्ह्याची कबुली दिली आहे. दरम्यान, रेल्वेच्या म्हणण्यानुसार, रेल्वे, आरपीएफ, जीआरपी आणि वैद्यकीय पथकांनी समन्वय साधून जखमी प्रवाशाला तातडीने रुग्णालयात दाखल केले होते. सध्या पोलिसांकडून आरोपीची कसून चौकशी सुरू आहे.
