मुंबई : गाडीच्या टपावर किंवा गाडीसमोर लाल दिव्यांच्या वापरावर केंद्र सरकारने बंदी घातली आहे. मात्र, मुंबईच्या प्रथम नागरिक महापौर रितू तावडे यांच्या व्हीआयपी गाडीच्या समोरील बाजूस लखलखणारे लाल आणि निळ्या रंगाचे दिवे लावण्यात आले होते. यासंदर्भातील वृत्त दैनिक ‘नवशक्ति’ने रविवारच्या अंकात छापताच, त्याच दिवशी महापौरांच्या व्हीआयपी गाडीसमोरील बाजूस असलेले लखलखणारे दिवे उतरवण्यात आल्याचे पालिका प्रशासनाकडून स्पष्ट करण्यात आले.
मुंबईच्या प्रथम नागरिक, महापौर रितू तावडे यांच्या व्हीआयपी गाडीच्या टपावरील लाल दिवा उतरवण्यात आला आहे. मात्र, गाडीच्या पुढील बाजूस महापालिकेचे बोधचिन्ह असलेल्या ठिकाणी लाल आणि निळ्या रंगाचे लखलखणारे दिवे लावण्यात आले होते. गाडीवर लाल दिव्याचा वापर करण्यावर केंद्र सरकारने एप्रिल २०१७ मध्ये बंदी घातली आणि मे २०१७ पासून अंमलबजावणीही सुरू झाली. तरीही महापौरांच्या व्हीआयपी गाडीच्या पुढील बाजूस लाल व निळ्या रंगाचे लखलखणारे दिवे झळकत असल्याचे वृत्त दैनिक ‘नवशक्ति’ने प्रसिद्ध केले. या बातमीची दखल घेत मुंबई महापालिका प्रशासनाने महापौरांच्या व्हीआयपी गाडीच्या पुढील बाजूस असणारे लाल व निळ्या रंगाचे लखलखणारे दिवे उतरवले आहेत.
पदाधिकाऱ्यांचे पदग्रहण झाल्यावर त्यांना वाहने पुरवली जातात. या वाहनांवरील लुकलुकणाऱ्या दिव्यांसंदर्भातील बाब निदर्शनास येताच पदाधिकारी यांच्या वाहनावरील लुकलुकणारे दिवे काढून टाकण्यात आल्याचे पालिका प्रशासनाकडून सांगण्यात आले.
