मुंबई : बहुप्रतीक्षित दहिसर-मीरा भाईंदर मेट्रो ९ मार्गिकेचा टप्पा १ आणि डी. एन. नगर ते मंडाले, मानखुर्द मेट्रो २ ब मार्गिकेच्या पहिल्या टप्प्याचे अखेर ७ एप्रिल रोजी लोकार्पण करण्यात येणार आहे. पूर्व उपनगरात मेट्रो २ ब मार्गिकेच्या निमित्ताने पहिली मेट्रो प्रवाशांच्या सेवेत दाखल होणार आहे. या दोन मेट्रो मार्गिकांसह ठाणे ते बोरिवली दुहेरी बोगदा प्रकल्पाच्या कामाला सुरुवात करण्यात येणार आहे. तसेच पॉड टॅक्सी प्रकल्पाचे भूमिपूजनही ७ एप्रिल रोजी पार पडणार आहे.
मेट्रो लाईन ९ मार्गिकेचा पहिला टप्पा आणि मेट्रो लाइन २ ब मार्गिकेच्या पहिल्या टप्प्याचे लोकार्पण ३ एप्रिल रोजी करण्याचे नियोजन एमएमआरडीएने केले होते. मात्र काही कारणांमुळे या दोन मार्गिकांचे लोकार्पण लांबणीवर गेले होते. अखेर एमएमआरडीएने या मार्गिकांच्या लोकार्पणाची तारीख जाहीर केली आहे. त्यानुसार ७ एप्रिल रोजी मुख्यमंत्री देवेंद्र फडणवीस, एमएमआरडीएचे अध्यक्ष एकनाथ शिंदे, उपमुख्यमंत्री सुनेत्रा पवार यांच्या उपस्थितीत होणार आहे.
