मुंबई : मुंबई मेट्रो वन प्रायव्हेट लिमिटेडने (एमएमओपीएल) व्यवस्थापन आणि माहिती सुरक्षा क्षेत्रात महत्त्वपूर्ण कामगिरी नोंदवली आहे. एमएमओपीएलला चार प्रतिष्ठित आयएसओ प्रमाणपत्रे प्रदान करण्यात आली आहेत. एकात्मिक व्यवस्थापन प्रणाली (आयएमएस) आणि माहिती सुरक्षा व्यवस्थापन प्रणाली (आयएसएमएस) यांचा एकत्रित समावेश असलेले प्रमाणपत्र मिळवणारी देशातील पहिली मेट्रो असल्याचा दावा एमएमओपीएलने केला आहे.
२६ सप्टेंबर रोजी मिळालेल्या या प्रमाणपत्रांमुळे संस्थेच्या व्यवस्थापन प्रक्रियांना आंतरराष्ट्रीय मानकांची जोड मिळाली आहे. कार्यपद्धती अधिक सक्षम करणे, प्रशासकीय प्रक्रियांमध्ये सुधारणा करणे, कार्यान्वयनातील जोखीम प्रभावीपणे हाताळणे आणि महत्त्वाची माहिती व डेटा सुरक्षित ठेवणे यावर या प्रणालींच्या माध्यमातून भर दिला जाणार आहे.
व्यवस्थापन, नियंत्रण व्यवस्था होणार बळकट
एमएमओपीएलकडून संस्थात्मक प्रक्रियांमध्ये सातत्यपूर्ण सुधारणा करण्याबरोबरच व्यवस्थापनातील पारदर्शकता आणि उत्तरदायित्व वाढविण्यावर भर देण्यात येत आहे. माहिती तंत्रज्ञानाच्या वाढत्या वापराच्या पार्श्वभूमीवर माहिती आणि संवेदनशील डेटाच्या सुरक्षेलाही विशेष महत्त्व प्राप्त झाले आहे. त्यामुळे आयएसएमएस प्रमाणपत्रामुळे माहिती सुरक्षा व्यवस्थापनासाठी निश्चित प्रक्रिया आणि नियंत्रण व्यवस्था अधिक बळकट होण्यास मदत होणार आहे.
गुणवत्ता, सुरक्षेसाठी महत्त्वाची वाटचाल
जागतिक स्तरावर मान्यताप्राप्त व्यवस्थापन पद्धतींचा अवलंब करून गुणवत्ता, सुरक्षा, उत्तरदायित्व आणि सातत्यपूर्ण सुधारणा यांची संस्कृती संस्थेत रुजवण्याच्या दिशेने ही प्रमाणपत्रे महत्त्वाची असल्याचे एमएमओपीएलने म्हटले आहे. या कामगिरीमुळे मुंबई मेट्रो वनच्या व्यवस्थापन प्रणाली, कार्यपद्धती आणि माहिती सुरक्षेच्या दृष्टीने स्वीकारण्यात आलेल्या मानकांना अधोरेखित करण्यात आले आहे.
