मुंबई : मुंबईच्या पाणीपुरवठा व्यवस्थेला अधिक सुरक्षित, सक्षम आणि भविष्यातील गरजांसाठी सक्षम करण्याच्या दृष्टीने महत्त्वपूर्ण मानल्या जाणाऱ्या पिसे ते पांजरापूर जलबोगदा प्रकल्पाला राज्य सरकारने सोमवारी मंजुरी दिली आहे. सुमारे आठ किलोमीटर लांबीच्या या जलबोगद्यामुळे पाणीगळती आणि पाणी चोरीच्या घटनांवर नियंत्रण मिळविण्यास मदत होणार असून मुंबईकरांना अधिक सुरळीत पाणीपुरवठा करण्याचा मार्ग मोकळा होणार आहे.
मुंबईला अप्पर वैतरणा, मोडकसागर, तानसा, मध्य वैतरणा, भातसा, विहार आणि तुळशी या सात तलावांमधून पाणीपुरवठा केला जातो.
या तलावांची एकूण साठवण क्षमता १४ लाख ४७ हजार ३६३ दशलक्ष लिटर इतकी असून दररोज सुमारे ४,१०० दशलक्ष लिटर पाणी विविध जलवाहिन्यांद्वारे मुंबईत पोहोचवले जाते.
या जलवाहिन्यांचे बाह्य भागात सुमारे ३८० किलोमीटरचे विस्तीर्ण जाळे असून भूमिगत जलवाहिन्यांची लांबी सुमारे ९० किलोमीटर आहे. विद्यमान जलवाहिन्यांमधून पाणी वाहतुकीदरम्यान गळती, अनधिकृत जोडण्या आणि पाणी चोरीसारख्या समस्या निर्माण होत असल्याने मोठ्या प्रमाणावर पाण्याची नासाडी होते. यावर दीर्घकालीन उपाय म्हणून महापालिकेने भूमिगत जलबोगद्यांच्या उभारणीचा पर्याय स्वीकारला आहे.
मुंबईतील जलबोगद्यांच्या कामाची स्थिती
१. अमर महल ते वडाळा, परळ आणि अमर महल ते ड्रॉम्बे जलबोगदा- कार्यान्वित होण्याच्या स्थितीत
२. पवई ते घाटकोपर-९० टक्के काम पूर्ण
३. कशेळी ते मुलुंड-या वर्षी काम सुरू-
४. येवई ते कशेळी-कुपक खोदण्याचे काम सुरू
५. धारावी ते घाटकोपर आणि घाटकोपर ते भांडुप जलबोगदा-विविध कामे सुरू
