मुंबई : मुंबईतील छत्रपती शिवाजी महाराज आंतरराष्ट्रीय विमानतळावर ये-जा करणाऱ्या प्रवाशांचा प्रवास सुखकर होणार आहे. १ जूनपासून आंतरराष्ट्रीय विमानतळावर प्रीपेड रिक्षा सुरू करा, असे आदेश परिवहनमंत्री प्रताप सरनाईक यांनी दिले आहेत. विमानतळाचे व्यवस्थापन अदानी समूहाकडे असल्याने आवश्यक सोयीसुविधा उपलब्ध उपलब्ध करा, असेही त्यांनी समूहाला सांगितले आहे.
मुंबईत छत्रपती शिवाजी महाराज आंतरराष्ट्रीय विमानतळ येथे टी-१ व टी - २ टर्मिनल आहे. आंतरराष्ट्रीय विमानतळाचे सर्व व्यवस्थापन अदानी समूहाकडे आहे. त्यामुळे अदानी समूह व परिवहन विभागाच्या समन्वयातून येत्या दोन महिन्यांत प्रीपेड रिक्षा सेवा सुरू करण्यासाठी सर्व आवश्यक पायाभूत सुविधा निर्माण कराव्यात. या निर्णयामुळे प्रवाशांना अधिक सोयीस्कर आणि सुलभरीत्या प्रवासी सुविधा उपलब्ध होणार असल्याने विमानतळाचे व्यवस्थापन पाहणाऱ्या अदानी समुहाने परिवहन विभागाच्या सहकार्याने १ जूनपासून प्रीपेड रिक्षा सेवा सुरू करावी, असे आदेश परिवहनमंत्री प्रताप सरनाईक यांनी परिवहन व अदानी समुहाला दिले.
नाशिक, सिंधुदुर्ग जिल्ह्यातील बस स्थानकांच्या कामकाजाचा आढावा परिवहनमंत्री प्रताप सरनाईक यांनी विधान भवनात घेतला. यावेळी मत्स्यव्यवसाय व बंदरे मंत्री नितेश राणे, आमदार देवयानी फरांदे, माजी मंत्री गजानन कीर्तीकर, परिवहन आयुक्त व एसटी महामंडळाचे उपाध्यक्ष व व्यवस्थापकीय संचालक (प्रभारी) विवेक भीमनवार, नाशिक व सिंधुदुर्ग जिल्ह्यातील एसटी महामंडळाचे संबंधित अधिकारी उपस्थित होते.
नाशिकचे मेळा बसस्थानक घेणार मोकळा श्वास
नाशिकच्या आमदार देवयानी फरांदे यांनी निवेदन सादर केले. प्रसाधनगृहे, बसस्थानक व परिसर अत्यंत अस्वच्छ असून नवीन बांधलेल्या मेळा बसस्थानकाची दुरावस्था झाली आहे. या बाबतीत संबंधित एसटीच्या अधिकाऱ्यांनी तातडीने उपाययोजना कराव्यात व येथे एक महिन्यांमध्ये संपूर्ण बसस्थानक समस्या मुक्त करावे असे निर्देश मंत्री सरनाईक यांनी दिले. तसेच आमदार फरांदे यांच्या मागणीनुसार महामार्ग बस स्थानकाचा विकास सिंहस्थ निधीतून करण्याबाबत शासन स्तरावर विचार करण्यात येईल. तसेच मेळा बसस्थानकाच्या समस्यांवर सकारात्मक मार्ग काढण्यात येईल, असेही सरनाईक यांनी सांगितले.
सिंधुदुर्ग जिल्ह्यात मिडी बस सेवा लवकरच
सिंधुदुर्ग जिल्ह्यातील एसटी महामंडळाच्या प्रलंबित प्रश्नांबाबत बोलताना मंत्री नितेश राणे म्हणाले की, सिंधुदुर्ग डोंगराळ, दुर्गम जिल्हा असून एसटी बस हा एकमेव आधार आहे. त्यामुळे बस सेवा सुरळीतपणे चालू रहावी व प्रवाशांची गैरसोय टाळून सुलभरीत्या त्यांना एसटी बसची सेवा मिळावी, यासाठी भविष्यात सिंधुदुर्ग जिल्ह्यासाठी मिडी बसेस उपलब्ध करून देण्यात याव्यात, अशी मागणी परिवहन मंत्री सरनाईक यांच्याकडे केली. त्यांच्या या मागणीला परिवहन मंत्र्यांनी सकारात्मक प्रतिसाद दिला. तसेच सिंधुदुर्ग जिल्ह्यातील बसस्थानक व बस गाड्यांच्या विविध अडचणीबाबत यावेळी चर्चा केली.
