मुंबई : मालमत्ता कर भरण्यासाठी शेवटचे दोन दिवस शिल्लक असून सोमवार व मंगळवार या दोन दिवसांत थकीत कर भरणा करावा आणि दंडात्मक कारवाई टाळावी, असे आवाहन मुंबई महापालिका प्रशासनाने केले आहे. करदात्यांना विहित वेळेत सुलभतेने करभरणा करता यावा, यासाठी ३० व ३१ मार्च रोजी सकाळी ८ ते रात्री १२ वाजेपर्यंत नागरी सुविधा केंद्रे (सीएफसी) सुरू राहणार आहेत.
पालिका आयुक्त भूषण गगराणी यांच्या निर्देशांनुसार, अतिरिक्त आयुक्त अश्विनी जोशी यांच्या मार्गदर्शनात, सहआयुक्त विश्वास शंकरवार, सहाय्यक आयुक्त गजानन बेल्लाळे यांच्या नेतृत्वात कर संकलनासाठी विशेष प्रयत्न करण्यात येत आहेत.
पालिकेच्या https://www.mcgm.gov.in या अधिकृत संकेतस्थळावरून करदात्यांना ऑनलाइन पद्धतीने कर भरण्याची सुविधा आहे. यामध्ये, आरटीजीएस, एनईएफटी, गुगल पे, बीबीपीएस, नेटबँकिंग, क्रेडिट नोट तसेच डेबिट व क्रेडिट कार्डद्वारा देयक भरण्याची सोय आहे तसेच, ऑफलाईन पद्धतीने नजीकच्या नागरी सुविधा केंद्रांवर (सीएफसी) करभरणा करता येऊ शकतो.
