पावसाने हजेरी लावल्यास सुरुवात केल्यानंतर मुंबईत पडझडीचे सत्र सुरु झाले आहे. सायनमधील चुनाभट्टी परिसरात नारायण हडके चाळीवर बुधवारी सकाळी दरड कोसळली. यात तिघे जण जखमी झाले. जखमींवर सायन रुग्णालयात उपचार सुरू आहेत.
मुंबईत गेले तीन दिवस पावसाचा जोर कायम असून आज सकाळीही पावसाच्या जोरदार सरी कोसळल्या. मुंबईत पाऊस सुरू असताना सायन येथील नागोबा चौक येथे एक मजली नारायण हडके चाळीवर सकाळी साडेदहाच्या सुमाराला दरड कोसळली. यात शुभम सोनावणे (१५), प्रकाश सोनावणे (४०) आणि सुरेखा गिरकर (२०) जखमी झाले. जखमींना तातडीने सायन रुग्णालयात दाखल करण्यात आले असूूून त्यांच्यावर उपचार सुरू आहेत, अशी माहिती मुख्य वैद्यकीय अधिकारी डॉ. उर्मिला यांनी दिली. दरम्यान, खबरदारीचा उपाय म्हणूून दरड कोसळलेल्या घराच्या आजूबाजूची घरे रिकामी करण्यात आली आहेत, अशी माहिती अग्निशमन दलाने दिली.
