स्वीटी भागवत
मुंबई : मुंबईतील व्यस्त ट्रॅफिक जंक्शनवर सिग्नलचे काऊंटडाऊन जसे-जसे संपत जाते, तसे पादचाऱ्यांना रस्ता ओलांडण्यासाठी जीव धोक्यात घालून सिग्नल ओलांडावा लागतो. काही छेदनबिंदूंवर (इंटरसेक्शन्स) पादचाऱ्यांना रस्ता ओलांडण्यासाठी मिळणारा अवधी अवघा १५ ते २० सेकंदांचा असल्याचा दावा केला जात आहे, ज्यामुळे वाहने पुन्हा सुरू होण्यापूर्वी ज्येष्ठ, अपंग किंवा वृद्धांना रस्ता ओलांडताना प्रचंड त्रास सहन करावा लागतो.
कफ परेड मेट्रो स्थानकाजवळील एका महत्त्वाच्या जंक्शनवर 'द फ्री प्रेस जर्नल'ने केलेल्या पाहणीत असे आढळले आहे की, रहिवाशांनी कमी वेळेच्या सिग्नलवर भरधाव वेगाने जाणाऱ्या दुचाकींवर आणि कोणत्याही दिशेने अचानक येणाऱ्या वाहनांमुळे रस्ता ओलांडताना होणाऱ्या त्रासावर चिंता व्यक्त केली आहे.
वेळ गरजेनुसार ठरवावी!
कफ परेडचे रहिवासी निकेत कुमार यांनी प्रश्न उपस्थित केला की, सिग्नलची ही कमी वेळ प्रत्येक जंक्शनच्या गरजेनुसार ठरवली जाते की स्थानिक परिस्थितीचा फारसा विचार न करता ती कुठेही लागू केली जाते? ही वेळ विशिष्ट क्षेत्रासाठी किंवा जंक्शनसाठी असते की ती अशीच लादली जाते, असा सवाल करत त्यांनी एका टर्निंग सिग्नलकडे लक्ष वेधले, जो केवळ सात ते आठ सेकंदांसाठी हिरवा राहत असल्याचे त्यांनी सांगितले.
ज्येष्ठांना सर्वाधिक त्रास
ज्येष्ठ नागरिकांसाठी रस्ता ओलांडणे ही आता सतत सतर्क राहण्याची आणि कोणतीही चूक न करण्याची कसरत करावी लागत आहे. गेल्या काही वर्षांत शहरातील वाहतुकीची परिस्थिती अधिकच कठीण झाली आहे. 'मी ३५ वर्षांपूर्वी मुंबईत आलो होतो, तेव्हा येथे एवढी गर्दी नव्हती. आता वाहनांची आणि विशेषतः दुचाकींची संख्या खूप वाढली आहे. चारचाकी वाहनांच्या तुलनेत दुचाकींची संख्या कमीत कमी १० पटीने जास्त आहे,' असे अशोक भरवानी या ज्येष्ठ नागरिकाने सांगितले.
रस्ता सुरक्षेचा मोठा प्रश्न
मुंबईत रस्ता पायाभूत सुविधा, उड्डाणपूल, मेट्रो मार्ग आणि जंक्शन सुधारणांवर सातत्याने गुंतवणूक केली जात असताना, पादचाऱ्यांच्या सुरक्षेलाही तितकेच प्राधान्य मिळाले पाहिजे, अशी नागरिकांची मागणी आहे. हा प्रश्न विशेषतः अशा ज्येष्ठ नागरिकांसाठी अत्यंत महत्त्वाचा आहे, ज्यांना रस्ता ओलांडण्यासाठी अधिक वेळेची गरज असते, तसेच वयामुळे किंवा शारीरिक मर्यादांमुळे ज्यांची चालण्याची गती मंदावली आहे. ट्रॅफिक सिग्नलचा उद्देश वाहतूक नियंत्रित करणे हा असतो, परंतु रहिवाशांचे म्हणणे आहे की पादचारी काऊंटडाऊनमुळे लोकांना वाहने सुरू होण्याच्या घाईत पळण्याऐवजी, सुरक्षितपणे रस्ता ओलांडण्यासाठी पुरेसा वेळ मिळाला पाहिजे.
