ज्येष्ठ नागरिकांसाठी गणपती दर्शनयात्रेचे आयोजन; पर्यटन विभाग तथा विविध महापालिकांचा उपक्रम

कोरोनाचे संकट ओसरल्यानंतर दोन वर्षांनंतर गणेशोत्सव धुमधडाक्यात साजरा केला जात आहे. गणेशोत्सव व स्वातंत्र्याच्या अमृतमहोत्सवी वर्षानिमित्त राज्याचा पर्यटन विभाग व स्थानिक महापालिकांनी संयुक्तपणे मुंबई, ठाणे, पुणे व नागपूर या महानगरांतील ६० वर्षांवरील ज्येष्ठ नागरिकांसाठी गणपती दर्शनयात्रेचे आयोजन केले आहे. १, २, ५, ६ व ७ सप्टेंबर या पाच दिवशी ही यात्रा आयोजित करण्यात येणार आहे. दरम्यान, या योजनेचा जास्तीत जास्त ज्येष्ठ नागरिकांनी लाभ घ्यावा, असे आवाहन राज्याचे पर्यटन, कौशल्य, रोजगार, उद्योजकता व नावीन्यता आणि महिला व बालकल्याणमंत्री मंगलप्रभात लोढा यांनी केले आहे.

महाराष्ट्रातील सार्वजनिक गणेशोत्सव हा एक महत्त्वाचा सांस्कृतिक सोहळा समजला जातो. राज्यभरातील गणेशोत्सव मंडळे आपापल्या परिसरात नयनरम्य देखावे, सांस्कृतिक कार्यक्रम व सामाजिक उपक्रम इत्यादी माध्यमातून अतिशय उत्साहाच्या वातावरणात गणेशोत्सव साजरा करतात. कोरोना महामारीदरम्यान गणेशोत्सव साजरा करण्यावरही स्वाभाविक मर्यादा आल्या होत्या; परंतु दोन वर्षांनंतर प्रथमच राज्यभरात मोठ्या उत्साहात व निर्बंधरहित वातावरणात गणेशोत्सवाचे आयोजन होणार आहे.

मंदिरात थेट प्रवेश

राज्याच्या पर्यटन विभागातर्फे ज्येष्ठ नागरिकांना त्यांच्या शहरांतील प्रसिद्ध सार्वजनिक गणेशोत्सव मंडळे व गणेश मंदिरांची यात्रा घडविली जाईल. यासाठी बृहन्मुंबई, ठाणे, पुणे व नागपूर महानगरपालिकेकडून वातानुकूलित बसेस, आरोग्यसेवक, गाईड व न्याहारी अशा सुविधा दिल्या जातील. तसेच सर्व मंडळे व मंदिरात श्री गणपती दर्शनासाठी थेट प्रवेश दिला जाईल. अधिक माहिती तसेच नोंदणीसाठी ७७३८६९४११७ अथवा ८७७९८९८००१ या क्रमांकावर संपर्क साधावा.