मुंबई : चुनाभट्टी परिसरातील ‘गॅलेक्सी अपार्टमेंट’ या १७ मजली इमारतीच्या टेरेसवरील कठड्याचे (पॅरापेट वॉल) प्लास्टर शुक्रवारी रात्रीच्या सुमारास कोसळले. या दुर्घटनेत रस्त्यावरून जाणाऱ्या एका पादचाऱ्याचा मृत्यू झाला.
चुनाभट्टी, कुरेशी नगर येथे तळ अधिक १७ मजली ‘गॅलेक्सी अपार्टमेंट’ ही इमारत आहे. या इमारतीच्या टेरेसचा भाग शुक्रवारी मध्यरात्री रात्री १२.३९ वाजता कोसळला. यावेळी इमारतीच्या खालून जाणाऱ्या पादचाऱ्यावर टेरेसचा भाग कोसळला. या घटनेत अब्दुल वहाब (५५) हे जखमी झाले असता त्यांना उपचारासाठी सायन रुग्णालयात दाखल करण्यात आले. मात्र, रुग्णालयात दाखल करण्यापूर्वी त्यांचा मृत्यू झाल्याचे रुग्णालय प्रशासनाकडून सांगण्यात आले.
या घटनेनंतर अग्निशमन दलाच्या जवानांनी प्रतिबंधक साधने आणि बांबूंच्या सहाय्याने इमारतीवरील धोकादायक व लोंबकळणारा भाग खाली पाडला. तसेच परिसर बॅरिकेड्स लावून बंद करण्यात आला आहे.
या बचाव व सुरक्षा कार्यात महापालिकेचे अग्निशमन दल, पोलीस, १०८ रुग्णवाहिका सेवा आणि संबंधित विभागीय कर्मचारी उपस्थित होते. दरम्यान, या दुर्घटनेचा पुढील तपास अग्निशमन दलाचे अधिकारी, स्थानिक पालिकेचे अधिकारी व स्थानिक पोलीस करत आहेत.
