मुंबईतील परळ येथील पेट्रोल पंपाला आग लागल्याची घटना आज घडली. महानगर पाइपलाइनमध्ये गॅस गळतीमुळे ही आग लागल्याचा संशय व्यक्त करण्यात येत आहे. अग्निशमन दलाच्या तीन गाड्या घटनास्थळी दाखल झाल्याने आगीवर नियंत्रण मिळवण्यासाठी अग्निशमन दलाकडून शर्थीचे प्रयत्न सुरू होते. त्यानंतर आग आटोक्यात आली आहे. पेट्रोल पंपाजवळ महानगर गॅस पाइपलाइन असून त्या पाइपलाइनमधून गॅसगळती झाल्यामुळे आग लागल्याचा संशय व्यक्त करण्यात येत आहे. दरम्यान, महानगर गॅसचे अधिकारी आणि स्थानिक लोकप्रतिनिधी घटनास्थळी पोहोचले. खबरदारीचा उपाय म्हणून परिसरातील काही दुकानांचा वीजपुरवठा बंद करण्यात आला आहे. परिसरातील लोकांना घराचे दरवाजे आणि खिडक्या बंद करण्यास सांगण्यात आले. आगीमुळे परिसरात धुराचे लोट पसरले होते.
