मुंबईतील भांडुप येथे गुरुवारी मध्यरात्री 1 वाजता दोन गटात जोरदारी मारामारी झाल्याची घटना घडली. या भांडणांत एका 22 वर्षीय तरुणाचा मृत्यू झाला, तर पाच जण गंभीर जखमी झाले आहेत. दोन्ही गटात प्रत्येकी सहा जण होते आणि चर्चेदरम्यान त्यांच्यात वादावादी सुरू झाली, वादाचं रुपांतर नंतर हाणामारीतपर्यंत गेलं. यावेळी एकाने चाकू काढून विरुद्ध गटातील व्यक्तीवर वार केले. यात २२ वर्षीय तरुणाचा मृत्यू झाला.
सूरज रमेश भालेराव (22) असं मृत तरुणाचं नाव असून त्याचा रुग्णालयात मृत्यू झाला आहे, तर त्याचे बाकीचे पाच मित्र कल्पेश चव्हाण, चेतन नाटेकर, आशिष बने, रितिक शेलार आणि संग्राम जाधव हे जखमी आहेत. यातील काही जणांना रुग्णालयातून सोडण्यात आल्याचं पोलिसांनी सांगितलं. भांडुप पोलिसांनी अनिकेश आंब्रे, स्वप्नील आंब्रे, विनय राऊत, गणेश कोळपते, मयूर कोटियन उर्फ दूध, नितेश दिगंबर परब उर्फ चिचो यांच्यावर खून आणि दंगलीचा गुन्हा दाखल केला आहे. सर्व पीडित व आरोपी भांडूप येथील कोकण नगर येथील रहिवासी आहेत.
कल्पेश चव्हाण याने केलेल्या आरोपांनुसार, तो त्याच्या मित्रांसह कोकण नगर येथील त्यांच्या राहत्या घराजवळ जनता फ्लोअर मिलसमोर बसला होता, तर आरोपी गटही काही मीटर अंतरावर स्वतंत्रपणे बसला होता. दोन्ही गटांची पार्टी सुरू असताना ते दोन्ही गट जोरजोरात बोलत होते. संशयित गटाला वाटलं की ते आपली छेडछाड करत आहेत. म्हणून आंब्रे याने संग्राम जाधव याला शिवीगाळ करण्यास सुरुवात केली आणि त्याच्या चेहऱ्यावर लोखंडी पोकळीने मारहाण केली. बिअरच्या बाटलीने त्याच्या डोक्यावर जोरदार प्रहार केला. त्यानंतर त्याचा राग अनावर झाला की त्यांनी रागाच्या भरात आंब्रे याने भालेराव याच्या पाठीवर, मांडीवर व मानेवर चाकूने वार केले, भांडूप पोलिसांनी याबाबतची माहिती दिली आहे.
