मुंबई : ‘गुरुनानक जयंती’निमित्त बुधवार, ५ नोव्हेंबर २०२५ रोजी सार्वजनिक सुट्टी आहे. त्यामुळे या दिवशी वीरमाता जिजाबाई भोसले वनस्पती उद्यान व प्राणिसंग्रहालय अर्थात राणी बाग जनतेकरिता सुरू राहणार आहे, तर दुसऱ्या दिवशी म्हणजे गुरुवार, ६ नोव्हेंबर २०२५ रोजी राणी बाग पर्यटकांसाठी बंद असेल, असे मुंबई पालिकेकडून सांगण्यात आले.
भायखळा (पूर्व) परिसरातील वीरमाता जिजाबाई भोसले वनस्पती उद्यान व प्राणिसंग्रहालय साप्ताहिक सुट्टीनिमित्त दर बुधवारी बंद असते. मात्र, मुंबई महानगरपालिकेने यापूर्वी मंजूर केलेल्या एका ठरावानुसार बुधवारी सार्वजनिक सुट्टी आल्यास त्या दिवशी उद्यान व प्राणिसंग्रहालय जनतेसाठी सुरू राहते, तर त्याच्या दुसऱ्या दिवशी बंद ठेवण्यात येते. त्यामुळे येत्या बुधवारी राणी बाग सुरू राहणार आहे.
