कोरोनापूर्व काळात धावत्या लोकलवर दगडफेकीच्या, बाटल्या फेकण्याचा घटना सर्रास घडत होत्या. रेल्वे पोलिसांनी अशा समाजकंटकांविरुद्ध अभियान राबवत या घटना थांबवण्यात यश मिळवले; मात्र नवी मुंबई शहरात काही दिवसापूर्वी असाच एक प्रकार बऱ्याच वर्षानंतर उघडकीस आला आहे. नवी मुंबईत रेल्वे मार्गावर जुईनगर ते नेरूळ दरम्यान दगड आणि बाटल्या फेकण्यात आल्या. यामध्ये तीन महिला व एक लहान मुलगा जखमी झाले. याप्रकरणी बाटली फेकून मारण्याचा शोध वाशी रेल्वे पोलीस घेत असून ज्या भागात असे प्रकार होतात, त्या ठिकाणी साध्या वेशातील पोलिसांची गस्त रेल्वे पोलिसांकडून पुन्हा सुरू करण्यात आली आहे. काहींना पकडण्यात यश आले असून अद्याप काही समाजकंटकांचा शोध सुरू आहे.
जुईनगर ते नेरूळ दरम्यान शुक्रवार, ७ ऑक्टोबर रोजी एका अज्ञात व्यक्तीने रिकामी बाटली लोकलच्या महिला बोगीच्या दिशेने भिरकावली. यात मुंबईत राहणाऱ्या सोनल सावंत यांच्या सह दोन महिला जखमी झाल्या आहेत. तसेच एका लहान मुलालाही काच लागली.
समाजकंटकांच्या शोधासाठी पुन्हा अभियान
दगडफेकीच्या घटना पुन्हा सुरू झाल्याने सुरक्षा यंत्रणांना पुन्हा अभियान राबवून प्रवाशांना विनासंकट प्रवास करण्यास सहकार्य करणे आवश्यक असल्याचे रेल यात्री परिषदेचे अध्यक्ष सुभाष गुप्ता यांनी सांगितले.