गिरीश चित्रे/मुंबई
कुर्ला-साकीनाका येथील खैरानी रोड परिसरात उघड्या मॅनहोलमध्ये पडून अस्लम शेख (५५) यांचा मृत्यू झाला. या प्रकरणात संबंधित कंत्राटदाराने महापालिकेच्या कारणे दाखवा नोटीसला उत्तर देत ‘त्या ठिकाणी माझे कोणतेही काम सुरू नव्हते,’ असे घूमजाव केले आहे. मात्र घटनास्थळी उपस्थित कामगारांचे जबाब आणि उपलब्ध पुराव्यांच्या आधारे हे स्पष्टीकरण महापालिकेने अमान्य केले असून संबंधित कंत्राटदाराला काळ्या यादीत टाकण्याची प्रक्रिया सुरू करण्यात आली आहे.
२ जुलै रोजी एल. वॉर्डमधील खैरानी रोड परिसरात मलनिस्सारण प्रचालन विभागाच्या अखत्यारितील मॅनहोलवर संरक्षक जाळी बसविण्याचे काम सुरू असताना अस्लम इसाक शेख (५५) हे मोबाईलवर बोलत पायी जात होते. मॅनहोलजवळ उभ्या असलेल्या व्यक्तीने त्यांना थांबविण्याचा प्रयत्न केला, मात्र त्यांचा तोल जाऊन ते उघड्या मॅनहोलमध्ये पडले आणि त्यांचा मृत्यू झाला.
या घटनेनंतर महापालिका आयुक्त अश्विनी भिडे यांनी एल. वॉर्डच्या सहायक आयुक्तांसह चार अधिकाऱ्यांना निलंबित केले.
