मुंबई : बॉलिवूड अभिनेता सलमान खान याच्या घरावरील गोळीबार प्रकरणात मुख्य संशयित लॉरेन्स बिष्णोई लवकरच मुंबई पोलिसांच्या ताब्यात येणार असल्याची माहिती पोलीस सूत्रांनी दिली. बिष्णोई सध्या गुजरात येथील साबरमती तुरुंगात आहे.
सलमान खानच्या घरावर गोळीबारप्रकरणी मुंबई पोलिसांना बिष्णोई हवा आहे. परंतु गृहमंत्रालयाच्या एका आदेशानुसार ३० ऑगस्टपर्यंत बिष्णोईला साबरमती तुरुंगातून इतरत्र हलविण्यासा मनाई करण्यात आली होती. मात्र, आता ही मुदत संपताच मुंबई पोलिसांच्या हालचालींना वेग आला आहे.
मुंबई पोलिसांच्या वरिष्ठ अधिकाऱ्यांनी दिल्ली येथे जाऊन गृहमंत्रालयातील वरिष्ठ अधिकाऱ्यांची भेट घेऊन चर्चा केली. यावेळी बिष्णोईच्या हस्तांतरणासंबंधीच्या कागदपत्रांची पूर्तता करण्यात आली. या भेटीनंतर या घटनेचा तपास करणाऱ्यां अधिकाऱ्यांना बिष्णोईला ताब्यात घेण्यासाठी आवश्यक बाबींची पूर्तता करण्याचे काम सोपवण्यात आले आहे. या सर्व घडामोडीवरून बिष्णोई लवकरच मुंबई पोलिसांच्या ताब्यात येईल, अशी माहिती पोलीस सूत्रांकडून मिळते.
