मुंबई : भाजपचे ज्येष्ठ नेते, माजी कॅबिनेट मंत्री आणि मुंबई भाजपचे माजी अध्यक्ष राज के. पुरोहित यांचे शनिवारी रात्री बॉम्बे हॉस्पिटलमध्ये निधन झाले. दक्षिण मुंबईतील भाजपचे प्रभावशाली नेते असलेले राज पुरोहित यांच्या निधनाने महाराष्ट्राच्या राजकीय आणि सामाजिक क्षेत्रातील एक अभ्यासू, अनुभवी आणि सर्वसामान्यांशी नाळ जोडलेला नेता काळाच्या पडद्याआड गेला आहे.
प्रकृती अस्वास्थ्यामुळे ७० वर्षीय पुरोहित यांना १५ जानेवारी रोजी रुग्णालयात दाखल करण्यात आले होते. मात्र त्यांनी अखेरचा श्वास घेतला. रविवारी सकाळी त्यांचे पार्थिव मरीन ड्राइव्ह येथील राजहंस बिल्डिंगमध्ये अंतिम दर्शनासाठी ठेवण्यात आले होते. यावेळी भाजपच्या अनेक नेत्यांनी त्यांचे दर्शन घेत श्रद्धांजली अर्पण केली. सोनापूर लेन स्मशानभूमीमध्ये पुरोहित यांच्या पार्थिवावर अंत्यसंस्कार करण्यात आले.
राज पुरोहित हे मुंबई भाजपमधील एक सामर्थ्यशाली नाव होते. विशेषतः दक्षिण मुंबईत त्यांचा मोठा राजकीय दबदबा होता. गिरगाव, काळबादेवी आणि मुंबादेवी परिसरातील स्थानिक प्रश्नांवर त्यांची मोठी पकड होती. मुंबईतील उत्तर भारतीय समुदायाचे नेतृत्व म्हणून त्यांनी आपली स्वतंत्र ओळख निर्माण केली होती. राज पुरोहित यांनी २५ वर्षांहून अधिक काळ महाराष्ट्र विधानसभेमध्ये आमदार म्हणून काम केले. ते मुंबईतील मुंबादेवी आणि कुलाबा मतदारसंघातून १९९०, १९९५, १९९९ आणि २००४ मध्ये झालेल्या विधानसभा निवडणुकांमध्ये निवडून आले होते. युती सरकारमध्ये (१९९५-१९९९) त्यांच्यावर कामगार, दुग्धविकास आणि संसदीय कार्य मंत्री म्हणून जबाबदारी सोपवण्यात आली होती. तसेच नंतर गृहनिर्माण मंत्री म्हणूनही त्यांनी मुंबईतील भाडेकरूंसाठी महत्त्वपूर्ण काम केले होते.
पुरोहित हे त्यांच्या स्पष्टवक्तेपणासाठी आणि आक्रमक शैलीसाठी ओळखले जात. विधानसभेत जनतेचे प्रश्न मांडताना त्यांचा आवाज नेहमीच बुलंद असायचा. सामान्य कार्यकर्त्यांसाठी ते राजभाई म्हणून परिचयाचे होते. आमदार आणि मंत्री म्हणून काम करत असतानाच राज पुरोहित यांनी पक्षसंघटनेतही महत्त्वाचे योगदान दिले होते. मुंबई भाजपचे अध्यक्ष म्हणून त्यांनी मुंबईत भाजपचा विस्तार करण्यास मोलाची भूमिका पार पडली. तसेच पक्षाच्या कठीण काळातही ते निष्ठेने सोबत राहिले. मुंबईतील अमराठी मतदारांना भाजपसोबत जोडण्यात त्यांचा महत्त्वाचा वाटा होता.
नुकत्याच झालेल्या मुंबई महानगरपालिकेच्या निवडणुकीत त्यांचे सुपूत्र आकाश पुरोहित हे वॉर्ड क्रमांक २२१ मधून निवडून आले. एकीकडे मुलाच्या विजयाचा आनंद असतानाच राज पुरोहित यांच्या निधनाने कुटुंबावर दु:खाचा डोंगर कोसळला आहे.
