मुंबई : बहुचर्चित शीना बोरा हत्याकांड प्रकरणात आत नव्याने कलाटणी मिळाली आहे. १२ वर्षांपूर्वी पेण पोलिसांना सापडलेले हाडांचे अवशेष गायब झाल्याचे उघड झाले आहे. हे अवशेष शोधूनही सापडले नाहीत, अशी स्पष्ट कबुलीच सीबीआयने गुरुवारी सत्र न्यायालयात दिली. दरम्यान, शीना बोरा हत्याकांडात शीनाच्या हाडांचे अवशेष हा महत्वाचा पुरावा मानला जात होता.
शीना बोरा हत्याप्रकरणी सीबीआय विशेष न्यायालयाचे न्यायाधीश एस. नाईक निंबाळकर यांच्यासमोर सुनावणी सुरू आहे. २०१२ मध्ये शीनाचा मृतदेह जाळण्यात आलेल्या ठिकाणी पेण पोलिसांना अवशेष सापडले होते. त्या अवशेषांची पहिली चाचणी जे. जे. रुग्णालयातील फॉरेन्सिक तज्ज्ञ डॉ. झेबा खान यांनी केली होती. ते अवशेष मानवी हाडांचे असल्याचा निष्कर्ष त्यांनी काढला.
मागील सुनावणीच्या वेळी सीबीआय वकील ॲड. सी. जे. नांदोडे यांनी पेण पोलिसांना १२ वर्षांपूर्वी सापडलेल्या अवशेषांची ओळख पटवण्याच्या हेतूने ते अवशेष खान यांना दाखवण्याची मागणी केली होती.
