देवश्री भुजबळ/मुंबई
देशात सुप्रसिद्ध असलेल्या प्रभादेवी येथील सिद्धिविनायक मंदिराच्या सुशोभीकरणाचे काम पुढील आठवड्यात होण्याची शक्यता आहे. या कामाच्या पहिल्या टप्प्याचे भूमिपूजन मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्या हस्ते होणार आहे.
सुशोभीकरणाच्या पहिल्या टप्प्यातील कामाचा अंदाजित खर्च ७८,०१,२०,०३८ रुपये असून, या कामासाठी ‘मे. इंजिनिअर्स स्टुडिओ प्रा. लि.’ यांची स्ट्रक्चरल सल्लागार म्हणून नियुक्ती करण्यात आली आहे. पहिल्या टप्प्यात सिद्धिविनायक मंदिराचे प्रवेशद्वार, मंदिराच्या आतील आणि बाहेरील भिंतींवर दगडी कोरीव काम, मंदिराच्या उत्तर बाजूचे छत, मंदिराभोवतीची जमीन (फ्लोअरिंग), विद्युत रोषणाई, प्लंबिंग इत्यादी कामांचा समावेश आहे. तसेच, तळघरात सुमारे १२९ वाहनांसाठी पार्किंगची सुविधा निर्माण करण्याचे कामही यात समाविष्ट आहे.
मुंबई मनपाच्या (बीएमसी) जी-उत्तर विभागाने नुकतीच या महत्त्वाकांक्षी प्रकल्पासाठी निविदा काढली होती. आम्ही भूमिपूजनासाठी मुख्यमंत्री आणि उपमुख्यमंत्र्यांच्या वेळेची प्रतीक्षा करत आहोत. येत्या आठवडाभरात भूमिपूजन होईल अशी आम्हाला आशा आहे, असे पालिकेच्या एका वरिष्ठ अधिकाऱ्याने सांगितले.
सिद्धिविनायक मंदिर ट्रस्ट मंदिरालगतची ‘राम मॅन्शन’ ही तीन मजली निवासी इमारत ताब्यात घेण्याच्या अंतिम टप्प्यात आहे. या संपादनामुळे मंदिर परिसराचा विस्तार आणि गर्दीच्या नियोजनासाठी मार्ग मोकळा होईल. प्रवाशांसाठी लिफ्ट, बेसमेंट पार्किंग आणि भाविकांचा प्रतीक्षा वेळ कमी करण्यासाठी प्रगत नियंत्रण यंत्रणा बसवली जाईल.
भक्तांसाठी मोफत अन्नदान
सिद्धिविनायक मंदिरात आता भाविकांसाठी मोफत जेवण देणारी ‘अन्नदान’ सेवा सुरू करण्यात येणार आहे. ही भोजन सेवा प्रस्तावित सुविधा केंद्रामध्ये असेल. ‘फ्री प्रेस जर्नल’शी बोलताना सिद्धिविनायक मंदिर ट्रस्टचे अध्यक्ष आणि शिवसेना नेते सदा सरवणकर म्हणाले होते की, ‘हे प्रसादालय शिर्डीच्या साईबाबा मंदिरासारखे असेल. भाविकांना मोफत जेवण दिले जाईल.
