मुंबईत नेत्र विकारांसाठी विशेष रुग्णालय;मुख्यमंत्र्यांकडून मुंबईतील आरोग्यसुविधांचा आढावा

देशभरातून कर्करोगाच्या उपचारासाठी मोठ्या संख्येने रुग्ण टाटा रुग्णालयात येतात.
मुंबईत नेत्र विकारांसाठी विशेष रुग्णालय;मुख्यमंत्र्यांकडून मुंबईतील आरोग्यसुविधांचा आढावा

मुंबईकरांना दर्जेदार वैद्यकीय उपचार मिळण्यासाठी उपलब्ध आरोग्यसुविधांचा पुनर्विकास जलद गतीने करण्यात यावा तसेच मुंबईत नेत्र विकारांसाठी विशेष रुग्णालय करावे, असे निर्देश मुख्यमंत्री एकनाथ शिंदे यांनी गुरुवारी दिले. मुंबईत सध्या महापालिकेमार्फत १९ उपनगरीय रुग्णालयांचे बांधकाम सुरू असून ते लवकरात लवकर पूर्ण करावे, असे मुख्यमंत्र्यांनी सांगितले.

देशभरातून कर्करोगाच्या उपचारासाठी मोठ्या संख्येने रुग्ण टाटा रुग्णालयात येतात. रुग्ण व त्यांच्या नातेवाईकांसाठी निवासाची सोय व्हावी, यासाठी लोकमान्य नगरमधील म्हाडा वसाहतीत खोल्या उपलब्ध करून द्याव्यात. त्याचबरोबर सायन, सांताक्रूझ येथे अशाप्रकारची सोय करण्यासाठी मुंबई महापालिकेनेदेखील पुढाकार घ्यावा, असे निर्देश मुख्यमंत्री एकनाथ शिंदे यांनी दिले.

मुंबई महानगरातील आरोग्यसुविधांचा दर्जा वाढावा यासाठी मुख्यमंत्र्यांच्या अध्यक्षतेखाली मंत्रालयात बैठक झाली. वैद्यकीय शिक्षणमंत्री गिरीश महाजन, आमदार सदा सरवणकर, मुख्य सचिव मनुकुमार श्रीवास्तव, मुंबई महापालिका आयुक्त इक्बाल चहल, आरोग्य विभागाचे अपर मुख्य सचिव डॉ. प्रदीप व्यास, म्हाडाचे व्यवस्थापकीय संचालक अनिल डिग्गीकर, नगर विकास विभागाच्या प्रधान सचिव सोनिया सेठी, वैद्यकीय शिक्षण विभागाचे सचिव सौरभ विजय आदी उपस्थित होते.

Related Stories

No stories found.
marathi.freepressjournal.in