प्लास्टिक पिशव्या विकणाऱ्यांवर कठोर कारवाई होणार

१ जुलैपासून याची अंमलबजावणी होणार असून वॉर्डनिहाय पथके कारवाई करणार असल्याची माहिती उपायुक्त संजोग कबरे यांनी दिली
प्लास्टिक पिशव्या विकणाऱ्यांवर कठोर कारवाई होणार

कोरोनामुळे गेल्या दोन वर्षांपासून थंडावलेल्या प्लास्टिक पिशव्यांवरील कारवाईला पुन्हा वेग येणार आहे. ५० मायक्रॉनपेक्षा कमी जाडीच्या प्लास्टिक पिशव्या विक्री करणारे व उत्पादन करणाऱ्यांवर कारवाईचा बडगा उगारण्यात येणार आहे. १ जुलैपासून याची अंमलबजावणी होणार असून वॉर्डनिहाय पथके कारवाई करणार असल्याची माहिती उपायुक्त संजोग कबरे यांनी दिली.

२६ जुलै, २००५मध्ये मुंबईत आलेल्या महापुरास प्लास्टिक पिशव्या कारणीभूत असल्याचा ठपका ठेवण्यात आला. त्यानंतर २०१८ मध्ये ५० मायक्रॉनपेक्षा कमी जाडीच्या प्लास्टिक पिशव्या विक्री, वापर करणारे व उत्पादन करणाऱ्यांवर कारवाईचा बडगा उगारण्याचा निर्णय घेण्यात आला. त्यानंतर मुंबई महापालिका प्रशासनाने कारवाईचा बडगा उगारला आणि ८६ हजार किलो प्लास्टिक जप्त केले. तर ४ कोटी ६५ लाखांचा दंड वसूल केला होता.

२०२० मध्ये मुंबईत कोरोनाचा शिरकाव झाला. मुंबई महापालिकेतील बहुतांश अधिकारी व कर्मचारी कोरोनाविरोधात लढ्यात सहभागी झाले. सध्या कोरोनाच्या चौथ्या लाटेचा इशारा देण्यात आला असला तरी पुन्हा एकदा प्लास्टिक पिशव्या विक्री वापर करणारे व उत्पादन करणाऱ्यांवर कारवाईचा अॅक्शन प्लॅन तयार केला आहे. १ जुलैपासून ही मोहीम प्रभावीपणे राबवण्यात येईल.

Related Stories

No stories found.
marathi.freepressjournal.in