मुंबई : घातक शस्त्रांच्या विक्रीसाठी आलेल्या दोघांना गुन्हे शाखेच्या कांदिवली युनिटच्या अधिकाऱ्यांनी अटक केली. या दोघांकडून पोलिसांनी दोन देशी बनावटीचे पिस्तूल आणि पाच जिवंत काडतुसे जप्त केले आहेत. कांदिवली परिसरात काही तरुण घातक शस्त्रांच्या विक्रीसाठी येणार असल्याची माहिती गुन्हे शाखेच्या अधिकाऱ्यांना मिळाली होती. या माहितीनंतर पोलिसांनी पोईसर जिमखाना रोड, राजीव गांधी उद्यानाजवळ साध्या वेशात पाळत ठेवली होती. तिथे आलेल्या निलेश आणि अमूल या दोन तरुणांची हालचाल संशयास्पद वाटताच त्यांना पोलिसांनी चौकशीसाठी ताब्यात घेतले. त्यांच्या अंगझडतीत पोलिसांना दोन देशी बनावटीचे पिस्तूल आणि पाच जिवंत काडतुसे सापडले. त्यानंतर या दोघांनाही पोलिसांनी अटक केली. त्यांच्याविरुद्ध घातक शस्त्रे बाळगल्याप्रकरणी गुन्हा नोंदविण्यात आला आहे. या दोघांना मंगळवारी किल्ला कोर्टात हजर केले जाणार आहे.
