मुंबई : घाटकोपर येथे एमडी ड्रग्ज विक्रीसाठी आलेल्या दोघांना वरळी युनिटच्या अंमली पदार्थ विरोधी पथकाच्या अधिकाऱ्यांनी अटक केली. या दोघांकडून पोलिसांनी सुमारे ३० लाख रुपयांचे दिडशे ग्रॅम वजनाचे एमडी ड्रग्ज जप्त केले आहेत. अटकेनंतर दोन्ही आरोपींना किल्ला कोर्टाने पोलीस कोठडी सुनावली आहे. घाटकोपर रेल्वे स्थानकाजवळ काही तरुण एमडी ड्रग्ज विक्रीसाठी येणार असल्याची माहिती वरळी युनिटच्या अधिकाऱ्यांना मिळाली होती. या माहितीनंतर पोलिसांनी तिथे गस्त सुरू केली होती.
यावेळी पोलिसांनी संशयित फिरणाऱ्या दोन तरुणांना चौकशीसाठी ताब्यात घेतले होते. त्यांच्या अंगझडतीत पोलिसांना प्रत्येकी सत्तर आणि ऐंशी ग्रॅम वजनाचे एमडी ड्रग्ज सापडले. त्याची किंमत सुमारे तीस लाख रुपये इतकी आहे. या दोघांविरुद्ध एनडीपीएस कलमांतर्गत गुन्हा नोंदविण्यात आला असून याच गुन्ह्यांत नंतर त्यांना पोलिसांनी अटक केली. अटकेनंतर त्यांना कोर्टाने गुरुवार १४ डिसेंबरपर्यंत पोलीस कोठडी सुनावली आहे.
