मुंबई : पालिकेने विलेपार्ले येथे कोट्यवधी रुपये खर्च करून उभारलेला मनोहर पर्रिकर आयुर्वेदिक दवाखाना गेले दोन वर्ष उद्घाटनाशिवाय धूळखात पडला आहे. यामुळे हा दवाखाना येत्या १५ दिवसांत सुरू करण्यात यावा, अशी मागणी स्थानिक नागरिकांकडून होत आहे.
विलेपार्ले येथील शहाजी रोड येथे असलेला स्वर्गीय मनोहर पर्रिकर आयुर्वेदिक दवाखाना व आरोग्य केंद्र कोट्यवधी रुपये खर्च करून बांधण्यात आला. पालिकेने बांधलेली पाच मजली आयुर्वेदिक रुग्णालय इमारत उद्घाटनाशिवाय दोन वर्षे बंद आहे.
या आरोग्य केंद्र आणि दवाखान्यातील इमारतीत वैद्यकीय उपकरणे तसेच इतर साहित्य उपब्लध करून देण्यात आले आहे, मात्र इमारतीतील कक्षांसाठी आवश्यक असलेल्या लाकडी फर्निचरसाठी अजूनही टेंडर काढण्यात आलेले नाही. त्यामुळे इमारतीचे उद्घाटन रखडले असल्याची माहिती पालिका सूत्रांनी दिली.
दरम्यान या आयुर्वेदिक दवाखान्याचे लवकरात लवकर उद्घाटन केल्यास येथील स्थानिकांना त्याचा फायदा होईल. तसेच परिसरातील अनेक रुग्ण येथे उपचारासाठी येतील. त्यामुळे हा दवाखाना लवकरच सुरू करण्याची मागणी स्थानिकांनी केली आहे. तसेच वैद्यकीय उपकरणे उपलब्ध असूनही हा दवाखाना सुरू होत नसल्याने स्थानिकांनी नाराजी व्यक्त केली आहे.
