फ्री प्रेस जर्नल न्यूज सर्व्हिस/मुंबई
पश्चिम रेल्वेच्या मुंबई विभागाने सुरू केलेला एक आगळावेगळा आणि पहिलाच उपक्रम प्रवाशांचा विश्वास संपादन करत आहे. ‘स्मार्ट असिस्टंट अँड रिफंड ॲक्सेस लिंक’ (सरल) या मोहिमेअंतर्गत २१ मार्च ते ३० मार्च या अवघ्या दहा दिवसांत ३७० डिजिटल रिफंड तक्रारींची नोंद झाली. यापैकी २५१ प्रकरणांचे निराकरण झाले असून ११९ प्रकरणे सध्या प्रक्रियेत आहेत.
सर्वाधिक तक्रारी उपनगरीय (लोकल) प्रवाशांकडून प्राप्त झाल्या आहेत. रेल्वे अधिकाऱ्यांनी पुष्टी केली की, तक्रार दाखल केल्यानंतर अवघ्या दोन दिवसांत अनेक प्रकरणे निकाली काढण्यात आली. ‘रेल वन’, ‘यूटीएस’ आणि ‘आयआरसीटीसी’सारख्या प्लॅटफॉर्मवर डिजिटल तिकीट बुक करताना अनेकदा प्रवाशांच्या खात्यातून पैसे कापले जातात, परंतु तिकीट तयार होत नाही. पूर्वी अशा प्रकरणांमध्ये परतावा मिळवण्यासाठी वारंवार पाठपुरावा करणे, लांबच लांब रांगेत उभे राहणे आणि त्रासदायक विलंबाचा सामना करावा लागत असे.
‘सरल’ उपक्रमांतर्गत प्रवाशांना एक ‘क्यूआर कोड’ दिला जातो, जो स्कॅन केल्यावर त्यांना त्वरित ऑनलाइन तक्रार नोंदवता येते.
प्रणाली रेल्वे आणि संबंधित बँक यांच्यात थेट समन्वय साधते, ज्यामुळे परताव्याची प्रक्रिया लक्षणीयरीत्या वेगवान होते. भारतीय रेल्वेमधील ही पहिलीच ‘रिफंड मोहीम’ असल्याचा दावा पश्चिम रेल्वेने केला असून यामुळे प्रवाशांना घरबसल्या तिकीट परताव्याच्या समस्या सोडवण्याची सोय उपलब्ध झाली आहे. त्यामुळे प्रवाशांना दिलासा मिळाला आहे.
परताव्याची आकडेवारी
कालावधी : २१ मार्च - ३० मार्च
एकूण दाखल तक्रारी : ३७०
निकाली काढलेली प्रकरणे : २५१
प्रक्रियेत असलेली प्रकरणे : ११९
सर्वाधिक तक्रारींचा विभाग : उपनगरीय रेल्वे तिकिटे
