![गुन्हा दाखल न करताच पोलिसांनी अपहृत अल्पवयीन मुलीला शोधले](http://media.assettype.com/freepressjournal-marathi%2F2024-03%2F16aa71d8-eaeb-4838-bc97-7490c83e9532%2FPolice.avif?w=480&auto=format%2Ccompress&fit=max)
मेघा कुचिक/मुंबई : २९ फेब्रुवारी रोजी वांद्रे (पू) येथील खेरवाडी भागातून दहा वर्षांची मुलगी कोचिंग क्लासला गेली. तिच्या शिक्षकाने तिला एक पुस्तक आणायला पाठवले होते. त्यानंतर ती मुलगी बेपत्ता झाली. पोलिसांनी तातडीने पावले उचलत तिला सुखरूप घरी सोडले. मात्र हे करताना पोलिसांनी याप्रकरणी गुन्हा दाखल केला नाही. तसेच तिची वैद्यकीय तपासणीही केली नाही.
या मुलीच्या नातेवाईकांनी सांगितले की, ही मुलगी नियमितपणे कोचिंग क्लासला जात होती. २९ फेब्रुवारीला तिच्या शिक्षकांनी तिला पुस्तक आणायला घरी पाठवले. ती घरी निघाली. अर्ध्या तासानंतरही ती क्लासला परतली नाही. तिच्या शिक्षकाने तिच्या आईला ही माहिती फोन करून दिली. मुलगी घरी न आल्याने तिला धक्काच बसला. तिच्या पालकांनी तातडीने तिचा शोध सुरू केला. मात्र ती सापडली नाही. तेव्हा तिच्या पालकांनी निर्मल नगर पोलीस ठाण्यात धाव घेऊन तातडीने कार्यवाहीची मागणी केली. पोलिसांनी चार पथके बनवून तपासाला सुरुवात केली. ठिकठिकाणचे सीसीटीव्ही फुटेज तपासले. तेव्हा ही मुलगी घराकडे निघाली. मात्र ती कोचिंग क्लासला परतताना दिसली नाही. गावदेवी पोलिसांनी निर्मल नगर पोलिसांना कळवले की, बेपत्ता मुलगी सापडली आहे. पोलिसांनी तात्काळ संबंधित मुलीच्या पालकांशी संपर्क साधला. ही मुलगी ग्रँट रोड रेल्वे स्थानकाजवळ बेंचवर बेशुद्ध अवस्थेत आढळली. रेल्वेचा आवाज ऐकून ती दचकून उठली. तिने एका महिला प्रवाशाला वडिलांकडे सोडण्यास सांगितले. या महिलेने तात्काळ गावदेवी पोलिसांशी संपर्क साधला. या पोलिसांनी निर्मल नगर पोलिसांना या मुलीबाबत कळवले.
या मुलीच्या काकांनी सांगितले की, या प्रकरणी गुन्हा दाखल होऊन तपास होईल असे आम्हाला वाटत होते. त्यातून गुन्हेगाराला पकडून शिक्षा करता आली असती. या पीडित मुलीला आता काहीच आठवत नाही. तिच्या नावावर कोणीतरी जोरात ठोसा दिला इतकेच तिला आठवते. तसेच ग्रँट रोड रेल्वे स्थानकावर तिला जाग आल्यानंतर तिला काय घडले हे तिला माहित आहे. मधल्या दोन तासात काय घडले हे तिला माहीत नाही.
पोलिसांनी या प्रकरणी गुन्हा दाखल करण्यास नकार दिला. तसेच त्या मुलीची वैद्यकीय तपासणीही केली नाही. पोलीस उपनिरीक्षक शशांक परब यांनी या प्रकरणाचा तपास केला.