रायपूर : छत्तीसगडमधील बिजापूरमध्ये नक्षलविरोधी मोहिमेत रविवारी सुरक्षा दलांनी ३१ नक्षलवाद्यांचा खात्मा केला. यावेळी झालेल्या चकमकीत दोन जवान शहीद झाले असून २ जवान जखमी झाले आहेत, अशी माहिती पोलिसांनी दिली.
छत्तीसगडचे उपमुख्यमंत्री विजय शर्मा म्हणाले की, इंद्रावती नॅशनल पार्कच्या विविध भागात सुरक्षा दलाचे ६५० जवान घुसले. यावेळी जोरदार चकमक झडली. या चकमकीत ३१ नक्षलवाद्यांचा खात्मा करण्यात सुरक्षा दलांना यश आले. मृत नक्षलवाद्यांची ओळख पटवली जात आहे.
दरम्यान, नक्षलवाद्यांविरुद्ध गेल्या अनेक दिवसांपासून कारवाई केली जात आहे. गेल्या ४० दिवसांत सुरक्षा दलांनी ५६ नक्षलवाद्यांचा खात्मा केला आहे. यंदा चार मोठ्या नक्षलवादी कारवाया करण्यात आल्या आहेत. यात पहिल्या चकमकीत ५, दुसऱ्या चकमकीत १२, तिसऱ्या चकमकीत ८ नक्षलवादी मारले गेले आणि आज ३१ नक्षलवाद्यांचा खात्मा करण्यात आला. म्हणजेच गेल्या ४० दिवसांत सुरक्षा दलांनी ५६ नक्षलवाद्यांचा खात्मा केला आहे. हे सर्व नक्षलवादी बिजापूरच्या राष्ट्रीय उद्यानात बस्तर एरिया कमिटीच्या कार्यकर्त्यांविरुद्धच्या कारवाईत मारले गेले आहेत.
राष्ट्रीय उद्यानात बस्तर एरिया कमिटी क्षेत्रातील जंगलात नक्षलवाद्यांविरोधात डीआरजी, एसटीएफ आणि बस्तर फायटर्स यांनी संयुक्तरित्या कारवाई केली. या कारवाईत ठार झालेल्या नक्षलवाद्यांकडून अनेक स्वयंचलित शस्त्रे जप्त करण्यात आली. चकमकीच्या ठिकाणाहून मोठ्या प्रमाणात एके ४७, एसएलआर, आयएनएएसएएस रायफल, ३०३, बीजीएल लाँचर शस्त्रे आणि स्फोटके जप्त करण्यात आली आहेत. तसेच, अधिक कारवाईसाठी अतिरिक्त दल पाठवले असून शोध मोहीम सुरूच आहे.
मुख्यमंत्री विष्णूदेव साय म्हणाले की, पंतप्रधान नरेंद्र मोदी व केंद्रीय गृहमंत्री अमित शहा यांच्या नेतृत्वाखाली मार्च २०२६ पर्यंत राज्य सरकार नक्षलवादाचा बीमोड करेल. नक्षलवाद संपवण्यासाठी सुरक्षा दल सातत्याने काम करत आहेत. नक्षलवाद हा देशाला लागलेला कर्करोग आहे. सैनिकांचे बलिदान वाया जाऊ देणार नाही. जे जवान यात शहीद झाले त्यांच्या आत्म्याला शांती लाभो, अशी मी परमेश्वरासमोर प्रार्थना करतो, असे त्यांनी सांगितले.
१४ महिन्यांत २७४ नक्षलवादी ठार
सुरक्षा दलांनी गेल्या वर्षभरापासून नक्षलवाद्यांविरुद्ध जोरदार मोहीम उघडली आहे. केंद्र सरकारने नक्षलवाद समूळ नष्ट करण्याचे लक्ष्य ठेवले आहे. त्यामुळे गेल्या १४ महिन्यांत छत्तीसगडमध्ये सुरक्षा दलांनी २७४ नक्षलवाद्यांना कंठस्नान घातले, तर १,१६६ जणांना अटक करण्यात आली आहे. तसेच ९६९ नक्षलवाद्यांनी आत्मसमर्पण केले आहे. बिजापूर जिल्ह्यातील फरसेगड परिसरात रविवारी सुरक्षा दल आणि नक्षलवाद्यांमध्ये जोरदार चकमक झाली. येथील राष्ट्रीय उद्यानाचे जंगल क्षेत्र हे नक्षलवाद्यांचा सक्रिय गड मानला जातो.
पुढील वर्षापासून नक्षलवादामुळे होणारे मृत्यू थांबणार - अमित शहा
३१ मार्च २०२६ नंतर एकाही भारतीयाचा नक्षलवादामुळे मृत्यू होणार नाही, असे प्रतिपादन केंद्रीय गृहमंत्री अमित शहा यांनी केले. छत्तीसगडमध्ये सुरक्षा दलांनी ३१ नक्षलवाद्यांना ठार केल्यानंतर शहा हे बोलत होते. आम्ही नक्षलवादाचा पूर्ण बीमोड करणार आहोत. भारत नक्षलमुक्त होण्याकडे वाटचाल करत आहे. बिजापूर येथील घटनेने आम्हाला मोठे यश मिळाले आहे. या हल्ल्यातील शहीद जवानांच्या कुटुंबीयांप्रती मी संवेदना व्यक्त करतो, असे ते म्हणाले.
