भोपाळ : विनाकारण साखळी ओढून रेल्वे गाड्यांना विलंब करणाऱ्या प्रवाशांच्या विरोधात भोपाळ रेल्वे विभागाने कडक कारवाईचा पवित्रा घेतला आहे. ठोस कारणाशिवाय रेल्वे साखळी ओढल्यास प्रवाशांना मिनिटाला ८ हजार रुपये दंड ठोठावला जाणार आहे.
अवैधरीत्या साखळी ओढल्याने गाड्यांना विलंब होतो तसेच आर्थिक फटका बसतो. त्यामुळे आरपीएफने ६ डिसेंबरपासून नवीन मोहीम सुरू केली आहे. त्यानुसार, विनाकारण साखळी ओढल्यास ५०० रुपये दंड अधिक प्रति मिनिट ८ हजार रुपये असा दंड ठोठावला जाईल. साखळी ओढल्यानंतर ५ ते ७ मिनिटे गाडी थांबते. त्यामुळे ५०० रुपये अधिक ५ मिनिटे गुणिले ८ हजार म्हणजे एकूण ४०,५०० रुपये दंड प्रवाशांना भरावा लागेल. गाडी जितका वेळ थांबेल, तितका दंड वाढत जाणार आहे. हा दंड एक लाख रुपयांपर्यंत जाऊ शकतो, असे सूत्रांनी सांगितले.
