नवी दिल्ली : अर्जेंटिनामधील पाच लिथियम ब्लॉक्सच्या शोधाशी संबंधित भारत सरकारचा करार कार्बन उत्सर्जन कमी करण्याच्या दिशेने एक मैलाचा दगड ठरेल. याशिवाय लिथियमच्या आयातीसाठी भारताचे चीनवरील अवलंबित्व कमी होण्यास मदत होईल. भारत सरकारने लिथियमच्या उत्खनन आणि खाणकामासाठी अर्जेंटिनासोबत करार केला आहे. १५,७०३ हेक्टर क्षेत्रावरील पाच लिथियम ब्राइन ब्लॉक्सचा समावेश असलेला हा भारतातील पहिला लिथियम शोध आणि खाण प्रकल्प आहे.
या धोरणात्मक हालचालीमुळे भारत आणि अर्जेंटिना यांच्यातील द्विपक्षीय संबंध केवळ मजबूत होणार नाहीत, तर खाण क्षेत्राच्या शाश्वत विकासालाही हातभार लागेल, ज्यामुळे विविध उद्योगांसाठी आवश्यक असलेल्या महत्त्वपूर्ण आणि धोरणात्मक खनिजांसाठी वातावरण उपलब्ध होईल, असे केंद्र सरकारने एका निवेदनात म्हटले आहे. पर्यावरणास अनुकूल भविष्यात सकारात्मक बदलासाठी लिथियम आवश्यक आहे. ऊर्जा रूपांतरणासाठी लिथियम हे सर्वात महत्त्वाचे खनिज म्हणून ओळखले जाते.
