अहमदाबाद : गुजरात एटीएसने ‘अल-कायदा’शी संबंधित चार संशयित दहशतवाद्यांना अटक केली आहे. त्यापैकी दोन जणांना गुजरातमधून तर दिल्ली आणि नोइडातून प्रत्येकी एका दहशतवाद्याला अटक केली आहे. सध्या त्यांची कसून चौकशी केली जात आहे.
गुजरात एटीएसने पकडलेल्या चार दहशतवाद्यांबाबत धक्कादायक माहिती समोर आली आहे. हे चौघेही ‘अल-कायदा’च्या मॉड्यूलशी संबंधित होते. चौघांचे वय २० ते २५ वर्षांच्यादरम्यान असून, भारतात मोठ्या प्रमाणात दहशतवादी हल्ल्यांचा कट रचत होते.
झीशान, फरदीन, सैफुल्ला आणि फारिक अशी या संशयित दहशतवाद्यांची नावे आहेत. एटीएसच्या मते, चौघेही सोशल मीडियाद्वारे ‘अल-कायदा’चा प्रचार-प्रसार आणि या गटात लोकांना जोडण्याचे काम करायचे. ही अटक सुरक्षा यंत्रणांचे मोठे यश मानले जात आहे. गुजरात एटीएस आणि केंद्रीय संस्था आता त्यांच्या नेटवर्क, निधी, प्रशिक्षण आणि परदेशी संपर्कांचे दुवे जोडण्यात गुंतल्या आहेत. येत्या काळात या प्रकरणात आणखी खुलासे आणि अटका होऊ शकतात.
