एप्रिल २०२२ साठी कृषी आणि ग्रामीण मजुरांसाठी अखिल भारतीय ग्राहक किंमत निर्देशांक (आधारभूत - १९८६-८७=१००) प्रत्येकी १० अंकांनी वाढून अनुक्रमे ११०८ (एक हजार एकशे आठ) आणि १११९ (एक हजार एकशे एकोणीस) पर्यंत पोहोचला आहे. शेतमजूर आणि ग्रामीण मजूर यांच्या सर्वसामान्य निर्देशांकात अनुक्रमे ७.३२ आणि ७.१३ पर्यंत झालेली वाढ मुख्यत्वे खाद्यान्नाच्या गटामुळे झाली आहे. तांदूळ, कणीक (गव्हाचे पीठ), ज्वारी, बाजरी, नाचणी भाज्या, फळे इत्यादींच्या किमती वाढल्यामुळे ही वाढ दिसून येत आहे.
निर्देशांकातील वाढ/ घट राज्याराज्यांत वेगवेगळी आहे. शेतमजुरांबाबत, निर्देशांकात १९ राज्यांमध्ये १ ते २० अंकांची वाढ नोंदली गेली तर तमिळनाडूमध्ये ७ अंकांची घट झालेली दिसून आली. १२७५ अंकांसह तामिळनाडू निर्देशांकाच्या सारणीत सर्वोच्च स्थानावर आहे तर ८८० अंकांसह हिमाचल प्रदेश सर्वात खालच्या स्थानावर आहे.
ग्रामीण मजुरांबाबत निर्देशांकात १९ राज्यांमध्ये २ ते १९ अंकांची वाढ दिसून आली आहे, तर तामिळनाडूमध्ये ७ अंकांची घट झाली आहे. १२६३ अंकांसह तामिळनाडू निर्देशांकाच्या सारणीत सर्वोच्च स्थानावर आहे तर ९३१ अंकांसह हिमाचलप्रदेश तळाशी आहे. राज्यांमध्ये शेतमजुरांच्या ग्राहक किंमत निर्देशांकातील सर्वाधिक वाढ केरळात (२० अंक) अनुभवाला आली, तर ग्रामीण मजुरांबाबत केरळ आणि पश्चिम बंगाल या दोन्ही राज्यांना (१९ अंक) हा अनुभव आला. मुख्यत्वे तांदूळ, डाळी, ताजी/ सुकी मासळी, भाज्या व फळे, कणीक, बाजरी, सरपण, सुती कापड (गिरणीचे), प्लॅस्टिकची पादत्राणे महागल्याने ही वाढ दिसून आली. तर याउलट, तामिळनाडूमध्ये शेतमजूर आणि ग्रामीण मजूर दोन्हींसाठीच्या ग्राहक किंमत निर्देशांकात घट दिसून येण्यामागे मुख्यत्वे तांदूळ, ताजी/ सुकी मासळी, कांदे आणि भाज्या व फळे यांमधील स्वस्ताई हे कारण होते. महागाईवाढीच्या दराचा गेल्या महिन्याच्या तुलनेत विचार करता, एप्रिल २०२२मध्ये अखिल भारतीय ग्राहक किंमत निर्देशांक कृषी मजूर आणि अखिल भारतीय ग्राहक किंमत निर्देशांक अनुक्रमे ६.४४ टक्के व ६.६७ टक्के, तर मार्च २०२२मध्ये ते अनुक्रमे ६.०९ टक्के व ६.३३ टक्के होते. गेल्या वर्षी ते अनुक्रमे २.६६ टक्के आणि २.९४ टक्के होते. त्याचप्रमाणे, खाद्यान्नांची महागाई एप्रिल २०२२मध्ये अनुक्रमे ५.२९ टक्के व ५.३५ टक्के होती, मार्च २०२२ मध्ये तिचे दर अनुक्रमे ४.९१ टक्के व ४.८८ टक्के होते तर गेल्यावर्षीच्या याच महिन्यात ते दर अनुक्रमे १.२४ टक्के आणि १.५४ टक्के होते.
