सर्वोच्च न्यायालयाने समलैंगिकतेला गुन्ह्याच्या श्रेणीतून बाहेर ठरवल्यापासून ‘एलजीबीटी’ समुदायाकडे पाहण्याचा लोकांचा दृष्टिकोन हळूहळू बदलत आहे. विमा कंपन्यांनीही ‘एलजीबीटी’ समुदायाला लक्षात घेऊन पॉलिसी आणण्यास सुरुवात केली आहे. समलैंगिक समुदायात आणि लिव्ह-इनमध्ये राहणाऱ्या लोकांसाठी विशेष आरोग्य विमा योजनेची घोषणा केली आहे. त्यामुळे या समुदायातील सदस्यांनाही सामान्य कुटुंबातील सदस्यांप्रमाणे आरोग्य विमा सुविधेचा लाभ घेता येणार आहे.
विमा कंपनीच्या या निर्णयामुळे समलैंगिक समुदायाच्या सदस्यांना आणि लिव्ह-इन रिलेशनशिपमध्ये राहणाऱ्या जोडप्यांना चांगले आरोग्य विमा संरक्षण मिळण्याचा मार्ग मोकळा झाला आहे; पण सध्या विशेष आरोग्य धोरणांमध्ये जननेंद्रियाची पुनर्रचना किंवा लिंगबदल यासारख्या शस्त्रक्रियांचा समावेश नाही. या समुदायानेही कंपनीच्या या निर्णयाचे स्वागत केले असून,समाजातील सदस्यांची स्वीकारार्हता वाढवण्यासाठी अजून बरेच काही करणे आवश्यक आहे. कंपनीच्या सर्वसमावेशक आरोग्य विमा उत्पादनाची निवड करणाऱ्या ग्राहकांना टेली-समुपदेशन, मानसिक आणि शारीरिक आरोग्यावरील वेबिनार, वेलनेस सेंटर्स, फिटनेस सेंटर्स, स्पोर्ट्स आणि डायग्नोस्टिक सेंटर्ससाठी व्हाउचर यासारख्या मूल्यवर्धित सेवादेखील मिळतील.फ्यूचर जनरली इंडिया इन्शुरन्सचे व्यवस्थापकीय संचालक आणि सीईओने एका अहवालात म्हटले की, “कंपनीने ‘एलजीबीटी’ समुदाय आणि लिव्ह-इन रिलेशनशिपमध्ये राहणारे लोक लक्षात घेऊन या नवीन उत्पादनासाठी कुटुंबाची व्याख्या विस्तृत केली आहे.
लिंगबदलाचा खर्च नाही
जननेंद्रियाची पुनर्रचना किंवा लिंगबदलासारख्या शस्त्रक्रिया या योजनेत समाविष्ट केल्या जाणार नाहीत. सध्या या पॉलिसीमध्ये लिंगबदलाशी संबंधित उपचारांचा समावेश केला जाणार नाही. ‘एलजीबीटी’ समुदायातील सदस्य आणि कुटुंबाच्या व्याख्येत राहणाऱ्या लोकांचा समावेश करणे, हा हे उत्पादन सुरू करण्याचा उद्देश आहे.
