विश्वजीत बॅनर्जी/अयोध्या :
श्री रामजन्मभूमी तीर्थक्षेत्र ट्रस्टचे माजी सरचिटणीस चंपत राय हे राम मंदिर देणगी चोरीच्या कथित प्रकरणाच्या विशेष तपास पथकाच्या (एसआयटी) थेट चौकशीच्या कक्षेबाहेर राहिले आहेत. कारण तपासकर्त्यांना ट्रस्टच्या आर्थिक आणि देणगी मोजणी प्रक्रियेशी संबंधित कोणत्याही अधिकृत कागदपत्रांवर चंपत राय यांची स्वाक्षरी आढळलेली नाही, अशी माहिती मिळाली आहे.
तपासाशी संबंधित सूत्रांनुसार, चंपत राय यांचे ट्रस्टच्या कामकाजावर पूर्ण नियंत्रण असले, तरी बँकिंग व्यवस्था, देणगी मोजणीची पद्धत आणि प्रशासकीय मंजुरीशी संबंधित सर्व महत्त्वाची कागदपत्रे माजी विश्वस्त डॉ. अनिल मिश्रा यांच्यामार्फत हाताळली जात असल्याचे एसआयटीला आढळले. परिणामी, एसआयटीच्या प्राथमिक अहवालात चंपत राय यांचा थेट उल्लेख न करता सर्व जबाबदारी डॉ. मिश्रा यांच्यावर करण्यात आली. निश्चित देणगी चोरीच्या कथित प्रकरणामुळे चंपत राय आणि डॉ. मिश्रा दोघेही संशयाच्या भोवऱ्यात आले होते. मात्र, एसआयटीने आपला प्राथमिक अहवाल सादर केला, तेव्हा कथित त्रुटींसाठी केवळ डॉ. मिश्रा यांचेच नाव पुढे आले. ट्रस्टचे मुख्य कामकाज सांभाळणारे प्रमुख व्यक्ती म्हणून चंपत राय यांच्याकडे पाहिले जात असताना, या अहवालातून त्यांचे नाव वगळले गेल्याने सर्वांचे लक्ष वेधले गेले.
सूत्रांनी सांगितले की, तपासात चंपत राय यांना वादग्रस्त निर्णयांशी थेट जोडणारा कोणताही कागदोपत्री पुरावा सापडलेला नाही. याउलट, तपासकत्यांना डॉ. मिश्रा यांच्या स्वाक्षऱ्या असलेले रेकॉर्ड सापडले आहेत, ज्यामध्ये बँकेसोबतचा सामंजस्य करार आणि देणग्या मोजण्याच्या मानक संचालन पद्धतीचा समावेश आहे. एसआयटीने आधार घेतलेल्या पुराव्यांमध्ये या कागदपत्रांचा मोठा वाटा आहे.
तपासाशी परिचित अधिकाऱ्यांनी संकेत दिले की, या सविस्तर अहवालात चंपत राय यांच्या पर्यवेक्षकीय भूमिकेची तपासणी केली जाऊ शकते आणि प्रशासकीय निष्काळजीपणासाठी त्यांना जबाबदार धरले जाऊ शकते; कारण ट्रस्टच्या कामकाजावर देखरेख ठेवण्याची जबाबदारी सर्वोच्च व्यवस्थापनाची होती. चंपत राय यांच्या जवळचे मानले जाणारे टिंनू यादव यांच्या भूमिकेचीही चौकशी सुरू आहे, ज्यांच्याकडे कथितपणे देणगी पेट्यांच्या चाव्या असायच्या.
१५ जुलै रोजी अहवाल देणार
सूत्र म्हणाले की, प्राथमिक चौकशी पूर्ण झाली असून सविस्तर तपास अंतिम टप्प्यात आहे. हा विस्तृत अहवाल १५ जुलै रोजी किंवा त्यानंतर राज्य सरकारला सादर केला जाण्याची शक्यता आहे.
