गौतम अदानी (Guatam Adani) आणि अदानी समूह (Adani Group) सध्या मोठ्या संकटात असल्याचे दिसून येत आहे. अदानी समूहासोबत झालेल्या मोठ्या वादानंतर त्यांचे शेअर्स तब्बल २८ टक्क्यांनी घसरले होते. यानंतर अदानी समूहाने तब्बल २० हजार कोटींचा एफपीओ (FPO) मागे घेण्याचा मोठा निर्णय घेतला. यामुळे गुंतवणूकदारांना मोठा धक्का बसला.
यासोबतच एफपीओ खरेदीचे सर्व पैसे गुंतवणूकारांना परत करणार असल्याचे त्यांनी जाहीर केले आहे. यानंतर पहिली प्रतिक्रिया देताना, यामागचे कारण स्पष्ट केले आहे. त्यांनी एक व्हिडीओ जारी केला असून त्यामध्ये ते म्हणाले की, "आमची बॅलन्सशीट मजबूत स्थितीमध्ये आहे. गुंतवणूकदारांचे नुकसान होऊ नये, यासाठी हा एफपीओ मागे घेण्याचा निर्णय आम्ही घेतला आहे." असे त्यांनी स्पष्ट केले.
व्हिडीओमध्ये गौतम अदानी म्हणाले की, "आमचे एफपीओ पूर्णपणे विक्री झाल्यानंतर बुधवारी आम्ही ते एफपीओ मागे घेण्याचा निर्णय घेतल्यामुळे अनेकांना धक्का बसला असेल. पण बुधवारी शेअर बाजारामध्ये निर्माण झालेली अस्थिरता बघता आमच्या बोर्डाला वाटले की, या एफपीओचे व्यवहार अशाच प्रकारे सुरू ठेवले तर ते नैतिकतेला धरून राहणार नाही. गेल्या ४० वर्षांच्या प्रवासामध्ये मला सर्वच भागधारकांचा चांगला पाठिंबा मिळाला आहे. खासकरून गुंतवणूकदारांनी मला पाठिंबा दिला आहे. मी आयुष्यात जे काही मिळवले, ते त्यांनी माझ्यावर दाखवलेल्या विश्वासामुळेच. माझ्या यशामागे त्यांचा मोठा वाटा आहे. माझ्यासाठी माझ्या गुंतवणूकदारांचे हित हे सर्वात महत्त्वाचे आहे. बाकी इतर सर्व दुय्यम आहे." असे स्पष्टीकरण दिले.
