नवी दिल्ली : देशभरातील डिलिव्हरी बॉय आणि गिग वर्कर्सच्या सुरक्षेच्या पार्श्वभूमीवर केंद्र सरकारने १० मिनिटांमध्ये डिलिव्हरी देण्यावर बंदी घातली आहे. केंद्रीय कामगार मंत्रालयाने यासंदर्भात देशातील प्रमुख ऑनलाइन डिलिव्हरी, क्विक कॉमर्स कंपन्यांशी चर्चा केल्यानंतर हा निर्णय घेतला.
केंद्रीय कामगार मंत्री मनसुख मांडविया यांनी यासंदर्भात ब्लिंकिट, झेप्टो, स्विगी आणि झोमॅटोसारख्या कंपन्यांच्या अधिकाऱ्यांशी चर्चा केली आणि डिलिव्हरी वेळेची मर्यादा काढून टाकण्याचे निर्देश दिले. यानंतर सर्व कंपन्यांनी सरकारला आश्वासन दिले की, ते आपापल्या ब्रँड जाहिराती आणि सोशल मीडियावरुन डिलिव्हरी वेळेची मर्यादा काढून टाकतील. म्हणजेच आता यापुढे कोणतेही सामान दहा मिनिटांत मिळणार नाही.
ब्लिंकिटने केली अंमलबजावणी
सरकारी निर्देशांचा तत्काळ परिणाम ब्लिंकिटवर दिसून आला. कंपनीने आपल्या सर्व जाहिरात आणि प्लॅटफॉर्मवरुन १० मिनिटांत डिलिव्हरीचा उल्लेख हटवण्याची घोषणा केली आहे. कंपनीने आपली टॅगलाइन बदलत “१० मिनिटांत १०,००० अधिक उत्पादने”ऐवजी, “तुमच्या दारात ३०,००० अधिक उत्पादने” अशी नवी जाहिरात केली आहे. येत्या काही दिवसांत इतर क्विक कॉमर्स कंपन्यांकडूनही अशाच प्रकारचे निर्णय घेतले जातील.
