नवी दिल्ली : भारतासह जगभरातील ‘चॅटजीपीटी’ बंद पडल्याचा फटका मंगळवारी शेकडो वापरकर्त्यांना बसला. ‘डाऊनडिटेक्टर’ या संकेतस्थळानुसार, भारतात दुपारी ३ वाजल्यापासून ‘चॅटजीपीटी’ वापरताना अडचणी येत असल्याची तक्रार अनेकांनी सोशल मीडियावर नोंदविली.
या तक्रारींपैकी ८२ टक्के तक्रारी वेबवर ‘चॅटजीपीटी’ वापरताना अडचणी येत असल्याच्या आहेत, तर १४ टक्के युजर्सनी ‘मोबाइल अॅप्लिकेशन’ वापाताना अडचण येत असल्याची तक्रार केली आहे. तसेच चार टक्के युजर्सनी ‘एपीआय इंटिग्रेशन’शी संबंधित तक्रार केली आहे. केवळ भारतातूनच नव्हे, तर जगभरातून या तक्रारी येत होत्या.
तक्रारींची दखल
महत्त्वाचे म्हणजे ‘ओपन एआय’नेही या तक्रारींची दखल घेतली असून यासंदर्भात निवेदन जारी केले. 'काही युजर्सना चॅटजीपीटी वापरण्यास अडचणी येत असल्याचे आमच्या निर्दशनास आले आहे. आम्ही याची दखल घेतली असून ती सोडवण्याचा प्रयत्न करत आहोत', अशी प्रतिक्रिया ‘ओपन एआय’कडून देण्यात आली आहे.
कामे रखडली
दरम्यान, ‘चॅटजीपीटी’ बंद पडल्याने अनेकांनी सोशल मीडियावर नाराजी व्यक्त केली आहे. शैक्षणिक तसेच इतर कामांसाठी ‘चॅटजीपीटी’चा वापर मोठ्या प्रमाणावर केला जात आहे. त्यामुळे त्यांची कामे रखडली असल्याची तक्रार सोशल मीडिया युजर्सनी केली आहे.
