काँग्रेसचे ज्येष्ठ नेते दिग्विजय सिंह यांनी पक्षाला घरचा आहेर दिला आहे. "काँग्रेसची संघटना ही कमकुवत झाली असून मतदानाच्या दिवशीही पक्षाचे निवडणूक व्यवस्थापन कमकुवत असते" अशी कानउघडणी त्यांनी केली. मध्य प्रदेशमध्ये प्रसारमाध्यमांशी बोलताना त्यांनी काँग्रेस पक्ष हा संघटित नसल्याचे मान्य करायला हरकत नाही, असेदेखील सांगितले.
कोबीग्रेसचे ज्येष्ठ नेते म्हणाले की, "मतदानादिवशी निवडणूक व्यवस्थापनात फार मोठी कमतरता भासते. जी तयारी करायला हवी, ती तयारी करण्यात येत नाही. लोकांना काँग्रेसला मतदान करायचे आहे. पण, आमची संघटना कमकुवत असल्याने ते करू शकत नाहीत." अशी नाराजी त्यांनी यावेळी व्यक्त केली. तसेच ते पुढे म्हणाले की, " काँग्रेस पक्षाचा जिथे पराभव झाला आहे, त्याठिकाणी भेटी देऊन अहवाल तयार केला जाणार आहे. त्यानंतर तो अहवाल माजी मुख्यमंत्री कमलनाथ यांच्याकडे सोपण्यात येणार आहे. यावरून आता निवडणुकीसाठी नवीन पद्धतीने रणनीती आखण्यात येणार आहे." असे त्यांनी सांगितले.
