दिल्ली : बंगळुरूमधील ४० शाळांना बॉम्बच्या धमक्या मिळाल्या, त्यापाठोपाठ दिल्लीतील जवळपास ५० शाळांना अशाच प्रकारच्या धमक्या देण्यात आल्या आहेत. बंगळुरूमधील शाळांमध्ये शोध पथके पाठवून तपास करण्यात आला. शुक्रवारी सकाळी दिल्लीतील जवळपास ५० शाळांना बॉम्बच्या धमक्या मिळाल्या. यामध्ये सिव्हिल लाईन्समधील सेंट झेवियर्स, पश्चिम विहारमधील रिचमंड ग्लोबल स्कूल, रोहिणीमधील अभिनव पब्लिक स्कूल आणि रोहिणीमधील द सॉवरेन स्कूल यांचा समावेश आहे. राजधानीतल्या शाळांना अशा धमक्या देण्याचा हा सलग चौथा दिवस आहे.
१०० शाळांना धमक्या
आठवड्याभरात भारतातील १००हून अधिक शाळांना धमकीचे संदेश आले आहेत. त्यापैकी ६० शाळा या दिल्लीतील होत्या. नंतर या धमक्या खोट्या असल्याचे निष्पन्न झाले. ते एन्क्रिप्टेड नेटवर्क आणि व्हीपीएनवरून पाठवण्यात आले होते. त्यामुळे ट्रॅक करणे कठीण झाले होते.
खासगी शाळा लक्ष्य
राजराजेश्वरी नगर आणि केंगेरीसह विविध भागातील खासगी शाळा लक्ष्य केल्या जात आहेत. बंगळुरू शहर पोलिसांनी अलर्टसाठी शाळांमध्ये अनेक पथके तैनात केली आहेत. ‘शाळेत बॉम्ब’ असे शीर्षक असलेला ई-मेल अनेक संस्थांना पाठवण्यात आला होता. या मेलमध्ये असा दावा करण्यात आला होता की बॉम्ब शाळांमध्ये लपवण्यात आला होता आणि विद्यार्थ्यांचे काय होईल याचे हिंसक पद्धतीने वर्णन करण्यात आले होते. तुम्हाला सर्वांना त्रास सहन करावा लागतो. मला मा‍झ्या आयुष्याचा खरोखरच तिरस्कार आहे, असेही या मेलमध्ये लिहिले होते.
