नवी दिल्ली : दिल्ली विधानसभेची निवडणूक जवळ आलेली असतानाच गृह मंत्रालयाने मद्य धोरणाशी संबंधित मनी लॉण्ड्रिंगप्रकरणी दिल्लीचे माजी मुख्यमंत्री अरविंद केजरीवाल यांच्यावर कारवाई करण्याची अनुमती सक्तवसुली संचालनालयाला (ईडी) दिली आहे. त्यामुळे केजरीवाल यांच्या अडचणींमध्ये वाढ होण्याची शक्यता आहे. या निर्णयावर ‘आप’ने जोरदार टीका केली असून भाजप सत्तेचा गैरवापर करीत असल्याचे म्हटले आहे.
केजरीवाल यांना मार्च महिन्यात अटक केल्यानंतर ईडीने विशेष पीएमएलए न्यायालयात त्यांच्याविरुद्ध आरोपपत्र दाखल केले. भाजप विविध यंत्रणांचा गैरवापर करीत आहे हे स्पष्ट आहे. निवडणुका जवळ आलेल्या असतानाच कारवाईची अनुमती देणे ही सत्तेच्या गैरवापराची व्याप्ती दर्शविते, असे ‘आप’ने म्हटले आहे.
केजरीवाल यांना जामीन मंजूर करण्यात आला असून ते दिल्ली विधानसभेची निवडणूक लढवत आहेत. मद्य धोरणाशी संबंधित मनी लॉण्ड्रिंगविरोधी कायद्यान्वये गृह मंत्रालयाने ईडीला केजरीवाल यांच्यावर कारवाई करण्याची अनुमती दिली आहे.
