अलिगड : अलिगड मुस्लीम विद्यापीठाच्या (एएमयू) दोन कर्मचाऱ्यांवर बुधवारी विद्यापीठाच्या संकुलातच दुचाकीवरून आलेल्या दोन जणांनी गोळीबार करण्याची घटना घडली आहे. या गोळीबारात जखमी झालेल्या दोन कर्मचाऱ्यांना रुग्णालयात दाखल करण्यात आले असून दोन्ही हल्लेखोर सध्या पोलीस कोठडीत आहेत.
गोळीबारात जखमी झालेल्या कर्मचाऱ्यांची नावे मोहम्मद नदीम आणि कलीम अशी आहेत. हे दोन कर्मचारी दुचाकीवरून जात असताना त्यांना दुचाकीवरूनच आलेल्या अन्य दोन जणांनी वाटेत अडविले आणि त्यांच्यावर जवळून गोळीबार केला. त्यामध्ये दोन कर्मचारी गंभीर जखमी झाले.
गोळीबाराचा आवाज ऐकताच संकुलातील सुरक्षा गस्ती पथकाने हल्लेखोरांचा पाठलाग केला आणि त्यांना पकडले आणि पोलिसांच्या स्वाधीन केले. पूर्ववैमनस्यातून हा हल्ला करण्यात आल्याचा प्राथमिक अंदाज आहे.