नवी दिल्ली : वस्तूंची महागाई आणि भू-राजकीय अनिश्चिततेमुळे कच्च्या मालाच्या किमतीत होणारी वाढ लक्षात घेता प्रमुख एफएमसीजी उत्पादक कंपन्या सप्टेंबरच्या तिमाहीत टप्प्याटप्प्याने किंमतवाढ लागू करण्याची शक्यता आहे. असे असले तरी मजबूत उपभोग पद्धती, प्रीमियम उत्पादनांकडील कल आणि सुधारित महसूल वाढीचा संदर्भ देत कंपन्यांनी मागणीबद्दल सकारात्मकता व्यक्त केली आहे.
जूनच्या तिमाहीत सरासरी २ ते ५ टक्क्यांची किंमतवाढ करणाऱ्या एफएमसीजी क्षेत्राने वाढती महागाई, कच्च्या तेलाच्या किमतीतील चढ-उतार आणि मान्सून व एल निनोसारख्या हवामानविषयक धोक्यांवर लक्ष ठेवले आहे. असे असूनही, नफ्याचे प्रमाण टिकवून ठेवण्यासाठी या चालू तिमाहीत कंपन्या वजन कमी करून 'श्रिंकफ्लेशन'चा मार्ग अवलंबत आहेत किंवा निवडक उत्पादनांच्या किमती वाढवत आहेत.
श्रिंकफ्लेशन म्हणजे...
श्रिंकफ्लेशन म्हणजे वस्तूची किंमत तीच ठेवून तिचे प्रमाण किंवा आकार कमी करणे. उदाहरणार्थ, एखाद्या बिस्किटच्या पाकिटाची किंमत पूर्वी ₹५० होती आणि त्यात १०० ग्रॅम बिस्किटे मिळत होती. नंतर किंमत ₹५०च ठेवून बिस्किटांचे प्रमाण ९० ग्रॅम केले तर तो श्रिंकफ्लेशनचा प्रकार मानला जातो.
