मुंबई : मध्य-पूर्वेतील वाढत्या भू-राजकीय तणावामुळे अक्षय्य तृतीयेच्या खरेदी हंगामापूर्वी जागतिक सोन्याच्या दरांमध्ये अल्पकालीन अस्थिरता निर्माण होऊ शकते. याचा परिणाम भारतात दागिन्यांच्या किमतींवर आणि ग्राहकांच्या खरेदीच्या प्रवृत्तींवर होण्याची शक्यता आहे.
'ऑल इंडिया जेम अँड ज्वेलरी डोमेस्टिक कौन्सिल' (जीजेएस) ने असे नमूद केले आहे की, उद्योग क्षेत्रातील नेत्यांनी नमूद केले की, मध्यपूर्व विशेषतः दुबई हे सराफा व्यापारासाठी एक प्रमुख जागतिक केंद्र आहे आणि भारतासह आशियाई बाजारपेठेत सोन्याचे प्रवेशद्वार आहे. या प्रदेशातील कोणत्याही वाढीमुळे जागतिक सराफा तरलतेवर परिणाम होऊ शकतो, पुरवठा साखळी विस्कळीत होऊ शकते आणि किंमत शोधावर परिणाम होऊ शकतो.
संभाव्य किमतीतील चढ-उतार असूनही भारतीय दागिने उद्योगाला अपेक्षा आहे की, मागणी स्थिर राहील. याला सध्या सुरू असलेला लग्नाचा हंगाम, सोन्याबद्दलची मजबूत सांस्कृतिक ओढ आणि संघटित किरकोळ विक्रेत्यांची वाढती उपस्थिती यांचा पाठिंबा आहे. किमती वाढताना ग्राहक हलक्या सोन्याचे दागिने आणि हिऱ्यांनी जडलेल्या डिझाइनची निवड करत आहेत.
हिरे व्यापारात भारत जागतिक स्तरावर अग्रेसर राहिला असून, हिऱ्यांच्या एकूण प्रमाणापैकी ९० टक्क्यांहून अधिक हिऱ्यांवर येथे प्रक्रिया केली जाते; यामध्ये सुरत आणि मुंबई ही प्रमुख केंद्रे म्हणून कार्यरत असून, ती अमेरिका, युरोप, मध्य-पूर्व आणि आशिया खंडांतील विविध बाजारपेठांना पैलू पाडलेल्या हिऱ्यांचा पुरवठा करतात.
चांदी, सोने दर घसरले
नवी दिल्ली: देशांतर्गत बाजारातील मंदीच्या वातावरणाचे सावट असल्याने ऐन गुढीपाडव्याच्या पूर्वसंध्येला मौल्यवान धातूचे दर बुधवारी काही प्रमाणात स्थिरावले. चांदीच्या दरात ६,००० रुपयांची घसरण झाली. भाव प्रति किलो २.५६ लाख रुपयांवर पोहोचला. तर सोन्याचा भाव १,००० रुपयांनी कमी होऊन प्रति १० ग्रॅम १.६० लाख रुपयांवर आला. 'ऑल इंडिया सराफा असोसिएशन'च्या माहितीनुसार, चांदीच्या दरात २.२८ टक्क्यांची घट झाली. मंगळवारच्या २,६२,५०० रुपये प्रति किलो या बंद भावाच्या तुलनेत बुधवारी चांदीचा भाव २,५६,५०० रुपये प्रति किलोवर स्थिरावला. सराफा बाजारात ९९.९ टक्के शुद्धतेच्या सोन्याचा भाव १,००० रुपयांनी, म्हणजेच ०.६२ टक्क्यांनी घसरून प्रति १० ग्रॅम १,६०,३०० रुपयांवर आला. यापूर्वी मंगळवारी सोन्याचा भाव १,०५० रुपयांनी वधारून प्रति १० ग्रॅम १,६१,३०० रुपयांवर बंद झाला होता. आंतरराष्ट्रीय बाजारात, 'स्पॉट' चांदीचा भाव ०.७९ टक्क्यांनी वधारून ७९.९२ अमेरिकन डॉलर्स प्रति औंसवर व्यवहार करत होता; तर सोन्याचा भाव १६.१० डॉलर्सने (०.३२ टक्क्यांनी) घसरून ४,९८९.६५ डॉलर्स प्रति औंसवर आला. व्यापाऱ्यांची नफा वसुली आणि प्रत्यक्ष मागणीतील निरुत्साहामुळे दरात घसरण दिसून आली.
