नवी दिल्ली : सुट्टीमुळे कमी दिवसांच्या या आठवड्यात अमेरिकेतील आर्थिक आकडेवारी, पश्चिम आशियातील तणाव आणि त्याचा कच्च्या तेलाच्या किमतींवर होणारा परिणाम यांमुळे सोने आणि चांदीच्या बाजारात पुन्हा एकदा अस्थिरता पाहायला मिळू शकते, असे विश्लेषकांनी सांगितले.
बाझारातील घटकांचे लक्ष आता अमेरिकेच्या आर्थिक कॅलेंडरकडे वळेल; ज्यामध्ये ग्राहक आत्मविश्वास, जीडीपी आणि पीसीई महागाईची आकडेवारी तसेच युरोझोनमधील महागाईच्या आकड्यांचा समावेश आहे. याव्यतिरिक्त, मॅन्युफॅक्चरिंग पीएमआय, फेडरल रिझर्व्हच्या अधिकाऱ्यांची भाषणे आणि अमेरिकेतील रोजगाराची आकडेवारी यांमुळे सोन्या-चांदीच्या बाजाराला पुढील दिशा मिळेल, असे ते म्हणाले. भू-राजकीय अनिश्चितता, विशेषतः अमेरिका आणि इराणमधील वाद, महत्त्वाची भूमिका बजावत राहील. अमेरिकेचे अध्यक्ष डोनाल्ड ट्रम्प यांनी नौदल नाकेबंदी उठवण्याच्या बदल्यात 'होर्मुझची सामुद्रधुनी' पुन्हा उघडणे आणि अणू चर्चा सुरू करण्याचा तेहरानचा (इराण) प्रस्ताव फेटाळल्याचे स्पष्ट केले आहे.
मल्टी कमोडिटी एक्सचेंजवर ऑक्टोबरच्या वितरणासाठी सोन्याचे वायदे गेल्या आठवड्यात २.३ टक्क्यांनी घसरून १.५ लाख रुपये प्रति १० ग्रॅमवर बंद झाले. तर चांदीचे वायदे ३ टक्क्यांनी घसरून २.३४ लाख रुपये प्रति किलोग्रामवर आले.
व्यापाऱ्यांनी उच्च स्तरावर आपल्या पोझिशन्स कमी केल्यामुळे बाजारातील सुधारणा मर्यादितच राहिली. डॉलर निर्देशांक १०१ च्या वर स्थिर राहिल्यास सोन्यावरील दबाव वाढू शकतो, कारण मजबूत डॉलरमुळे डॉलर-मूल्यांकित मौल्यवान धातूंची मागणी कमी होते.
जागतिक बाजारात, कॉमेक्सवर डिसेंबरच्या वितरणासाठी सोन्याचे वायदे १०३.७ डॉलरने (२.३४ टक्के) घसरून ४,३२१.२ डॉलर प्रति औंसवर आले. न्यू यॉर्कमध्ये चांदी २.३५ डॉलरने (३.५ टक्के) घसरून ६४.८० डॉलर प्रति औंसवर बंद झाली.
