सोशल मीडियावर मालगाडीचा एक धक्कादायक व्हिडीओ व्हायरल झाल्याने सर्वांचा थरकाप उडाल आहे. जम्मुच्या कथुआ येथून लोको पायलटशिवाय निघालेली मालगाडी पठाणकोटच्या दिशेनं निघाली. लोको पायलटला चहाची तलप आल्यानं तो मालगाडीतून खाली उतरला पण त्याने ट्रेनचा हँडब्रेक ओढला नव्हता. ट्रॅकवर उतरण असल्याने मालगाडी थेट पठाणकोटच्या दिशेनं निघाली. लोको पायलट नसतानाही ताशी १०० किमीच्या वेगानं (14806 R) ही मालगाडी धावल्याचं एका व्हायरल व्हिडीओच्या माध्यमातून समोर आलं आहे. . या मालगाडीचा खतरनाक व्हिडीओ सोशल मीडियावर तुफान व्हायरल झाला आहे.
रेल्वे अधिकाऱ्यांच्या अथक प्रयत्नानंतर कथुआ येथून निघालेल्या मालगाडीला पंजाबच्या मुकेरियन येथील उंची बस्सी भागात थांबवण्यात आलं. याप्रकरणी चौकशीचे आदेश देण्यात आल्याचं जम्मूच्या डिविजनल ट्रॅफिक मॅनेजरनं एएनआयशी बोलताना म्हटलं आहे.
थरकाप उडवणारा व्हिडीओ पाहिलात का?
लोको पायलटशिवाय निघालेली मालगाडी स्टेशनवरून सुसाट जात असल्याचं या व्हिडीओत पाहायला मिळत आहे. कथुआ स्टेशनवर थांबलेली ही मालगाडी लोको पायलटशिवाय धावू लागली आणि दोन तासात १६० किमीचं अंतर पार केल्यानंतर मुकेरियाच्या उंची बस्सी येथे जाऊन थांबली, अशी माहिती सूत्रांनी दिली आहे. रविवारी सकाळी ७ वाजताच्या सुमारास ही घटना घडली.
या घटनेत कोणतीही जिवितहानी झाही नाहीय. रेल्वे ट्रॅकवर स्लोप असल्याने मालगाडी सुरु झाली असल्याची माहिती समोर येत आहे. लोकोपायलट आणि रेल्वेच्या अधिकाऱ्यांवर अद्याप कोणतीही कारवाई झाली नसल्याचं समजतय. याप्रकरणी चौकशी सुरु असून या घटनेमागचं नेमकं कारण शोधलं जात आहे.