अमेरिकेचे राष्ट्राध्यक्ष डोनाल्ड ट्रम्प यांच्या नावाने हैदराबादमधील अमेरिकेच्या वाणिज्य दूतावासालगतच्या रस्त्याचे नामकरण करण्याचा प्रस्ताव तेलंगणा सरकारने रविवारी (७ डिसेंबर) मांडला आहे. यानुसार, हा हाय-प्रोफाइल रस्ता ‘डोनाल्ड ट्रम्प अव्हेन्यू’ म्हणून ओळखला जाईल.
मुख्यमंत्री कार्यालयाने (CMO) जारी केलेल्या निवेदनानुसार, या निर्णयाची माहिती राज्य सरकार लवकरच केंद्रीय परराष्ट्र मंत्रालयाला आणि अमेरिकन दूतावासाला अधिकृतरित्या देणार आहे.
रतन टाटा, गूगल, मायक्रोसॉफ्ट, विप्रो यांच्याही नावाने रस्ते
याशिवाय राज्य सरकारने रविर्याल येथील नेहरू आउटर रिंग रोडला प्रस्तावित प्रादेशिक रिंग रोडशी जोडणाऱ्या आगामी ग्रीनफिल्ड रॅडिअल रोडला दिवंगत उद्योगपती रतन टाटा यांचे नाव देण्याचा निर्णय घेतला आहे. रविर्याल इंटरचेंजला यापूर्वीच ‘टाटा इंटरचेंज’ असे नाव देण्यात आले आहे.
गेल्या महिन्यात दिल्लीत झालेल्या यूएस–इंडिया स्ट्रॅटेजिक पार्टनरशिप फोरम (USISPF) परिषदेत मुख्यमंत्री रेवंत रेड्डी यांनी हैदराबादमधील काही प्रमुख रस्त्यांना जागतिक कंपन्यांच्या नावाने ओळख देण्याचा प्रस्ताव सुचवला होता. त्यानुसार, सरकारने आता येथील महत्त्वाचा रस्ता ‘गूगल स्ट्रीट’ म्हणून घोषित करण्याचा निर्णय घेतला आहे. गूगलचे आगामी कॅम्पस-जे अमेरिकेबाहेरील सर्वात मोठे कॅम्पस असणार आहे-तो रस्ता ‘गूगल स्ट्रीट’ नावाने ओळखला जाईल. मायक्रोसॉफ्ट आणि विप्रोलाही ‘मायक्रोसॉफ्ट रोड’ आणि ‘विप्रो जंक्शन’ या स्वरूपात शहराच्या नकाशावर स्थान देण्यात येणार आहे. राज्यातील काही अन्य नामवंत व्यक्ती आणि कॉर्पोरेटसाठीही रस्त्यांची नावे समर्पित करण्याचा प्रस्ताव आहे.
तेलंगणा रायझिंग ग्लोबल समिटपूर्वी घोषणांचा वर्षाव
हा प्रस्ताव तेलंगणाला ‘इनोव्हेशन-ड्रिव्हन इंडिया’ चे मॉडेल राज्य म्हणून सादर करण्याच्या उद्देशाने आहे. या सर्व घोषणा ‘तेलंगणा रायझिंग ग्लोबल समिट’ च्या पूर्वसंध्येला करण्यात आल्या. हा दोन दिवसीय समिट ‘भारत फ्युचर सिटी’ येथे सोमवारपासून सुरू होत असून राज्यातील मोठ्या गुंतवणूक संधींचे प्रदर्शन यात होणार आहे. राज्याची 'इनोव्हेशन-आधारित' ओळख बळकट करणे आणि विदेशी गुंतवणुकीला आकर्षित करणे हा यामागील मुख्य उद्देश आहे. अधिकाऱ्यांच्या माहितीनुसार, ४४ देशांमधील १५४ आंतरराष्ट्रीय प्रतिनिधी या कार्यक्रमासाठी उपस्थित राहतील.
भाजपची तीव्र टीका : “हैदराबादचे भाग्यनगर करा”
या निर्णयावर भाजपने तीव्र प्रतिक्रिया नोंदवली आहे. केंद्रीय मंत्री आणि भाजपा नेते बंदी संजय कुमार यांनी मुख्यमंत्री रेवंत रेड्डी यांच्यावर निशाणा साधत म्हटले- जर काँग्रेस सरकार नावे बदलण्यास इतके उत्सुक असेल, तर त्यांनी अशा गोष्टीपासून सुरुवात करावी ज्याचा खरोखर इतिहास आणि अर्थ आहे. रेवंत रेड्डी जे काही ट्रेंडिंगमध्ये येईल त्यानुसार ठिकाणांची नावे बदलत सुटले आहेत अशी टीका करताना हैदराबादचे नाव बदलून भाग्यनगर करा, अशी मागणी त्यांनी केली.
