नवी दिल्ली : भारत-इराणने हायड्रोकार्बन क्षेत्रात सहकार्य वाढवण्याचे ठरवले आहे. इराणचे पेट्रोलियम मंत्री मोहसेन पाकनेजाद यांनी गुरुवारी केंद्रीय पेट्रोलियम आणि नैसर्गिक वायू मंत्री हरदीप सिंग पुरी यांची भेट घेतली.
इराणचे मंत्री ११ व्या ‘ब्रिक्स’ ऊर्जा मंत्री परिषदेत सहभागी होण्यासाठी भारतात आले आहेत. भारत आपल्या २०२६ च्या अध्यक्षतेखाली ११ व्या ब्रिक्स ऊर्जा मंत्री परिषदेचे यजमानपद भूषवत आहे.
पाकनेजाद यांनी ११ व्या ब्रिक्स ऊर्जा मंत्री परिषदेला संबोधित केले. जिथे त्यांनी जागतिक ऊर्जा क्षेत्रापुढील महत्त्वाच्या प्रश्नांवर इराणची भूमिका मांडली.
नवी दिल्लीत आगमन झाल्यावर इराणी मंत्र्यांनी भारत आणि इराणमधील दीर्घकालीन संबंधांवर प्रकाश टाकला आणि आर्थिक सहकार्य अधिक दृढ करण्याची तयारी दर्शवली.
पाकनेजाद म्हणाले, ‘निर्बंधांच्या बाबतीत, जसे तुम्हाला माहित आहे की, आमच्याकडे ६० दिवसांची सवलत आहे आणि निर्बंधांबाबत अमेरिकन लोकांशी आम्ही ज्या काही मुद्द्यांवर सहमती दर्शवली आहे, त्यानुसार आम्ही पुढे जात आहोत.’
आपल्या दौऱ्यात, पेट्रोलियम मंत्री मोहसेन पाकनेजाद देशातील ऊर्जा क्षेत्रातील अधिकारी आणि प्रतिनिधींशी चर्चा करणार आहेत. तेल आणि वायू क्षेत्रात द्विपक्षीय सहकार्य विस्तारणे, गुंतवणुकीच्या संधी शोधणे आणि जागतिक ऊर्जा बाजारातील अलीकडील घडामोडींवर मते मांडणे हे त्यांच्या दौऱ्याच्या अजेंड्यातील महत्त्वाचे मुद्दे आहेत.
इराणी दूतावासाच्या निवेदनानुसार, या बैठकीत दोन्ही बाजूंनी ऊर्जा क्षेत्रातील द्विपक्षीय सहकार्य विस्तारण्यावर भर दिला आणि दोन्ही देशांमधील सहकार्य अधिक दृढ करण्याच्या मार्गांवर चर्चा केली.
