मुंबई : सोन्याचे दर घटल्यामुळे आणि किमती स्थिर झाल्यामुळे देशात सोन्याच्या मागणीची स्थिती सुधारत असून, यामुळे आगामी सणासुदीच्या हंगामात मोठी विक्री होण्याची अपेक्षा निर्माण झाली आहे, असे 'वर्ल्ड गोल्ड कौन्सिल'ने आपल्या ताज्या अहवालात म्हटले आहे.
वर्ल्ड गोल्ड कौन्सिलच्या 'इंडिया गोल्ड मार्केट अपडेट'नुसार, दर कमी झाल्याने दागिन्यांच्या मागणीला बळ मिळाले आहे. जुलै महिन्यातील स्थैर्यानंतर आणि ऑगस्ट महिन्यातील रिकव्हरीनंतर ग्राहकांनी घसरलेल्या दरांचा फायदा घेत खरेदीवर भर दिला आहे.
पुढे ढकललेली खरेदी पुन्हा परतली असून दुकानांमधील ग्राहकांची गर्दी वाढली आहे. आता केवळ लग्नसराईपुरती मर्यादित न राहता इतर खरेदीही वाढली आहे.
सणासुदीचा काळ लक्षात घेऊन किरकोळ विक्रेते आणि उत्पादकांनी दागिन्यांचा साठा वाढवण्यास सुरुवात केली आहे. उत्पादकांना दागिन्यांसाठी नवीन ऑर्डर्स मिळण्यास सुरुवात झाली आहे.
नवीन दागिने खरेदी करताना जुने सोने बदलून घेण्याचे प्रमाण उच्च पातळीवर असून ते खरेदी सुलभ करण्यात महत्त्वाची भूमिका बजावत आहे. किमतीतील घसरणीमुळे रणनीतिक गुंतवणूक करू इच्छिणाऱ्या गुंतवणूकदारांना आकर्षित केले आहे.
जुने सोने बदलून मिळणाऱ्या सोन्यामुळे पुरवठ्याला मदत होत असली तरी आयातीतील वाढ ही भौतिक मागणी मजबूत असल्याचे दर्शवते.
जुलै महिन्यातील आयात मूल्य : $४.१६ अब्ज (जून मधील $१.९७ अब्जच्या तुलनेत दुप्पट)
आयातीचे प्रमाण (व्हॉल्यूम) : ४० ते ४५ टन (जूनमध्ये २० टन)
एकूण आयातीतील वाटा : जुलैमध्ये ५% (जानेवारी-मार्चमधील सरासरी ११% च्या तुलनेत कमी)
बाजारपेठेतील स्थिती : जुलैमध्ये किमती स्थिर झाल्यानंतर ऑगस्टमध्ये सुधारणा, ग्राहकांकडून खरेदीला सुरुवात
