भारतीय तटरक्षक दलाचे हेलिकॉप्टर एका बचाव मोहिमेदरम्यान अरबी समुद्रात पडल्याचे समोर आले आहे. हेलिकॉप्टरला सोमवारी रात्री उशीरा समुद्रात 'इमर्जन्सी लँडिंग' करावी लागली. यावेळी 'हार्ड लँडिंग' झाल्याने ही दुर्घटना घडल्याचे समजते. त्यानंतर हेलिकॉप्टरमधील चारपैकी तीन क्रू मेंबर बेपत्ता झाले असून त्यांना सुखरूप बाहेर काढण्यासाठी शोधमोहिम सुरू करण्यात आली आहे.
मिळालेल्या माहितीनुसार, गुजरातमधील पोरबंदरपासून सुमारे ४५ किलोमीटर अंतरावर असलेल्या 'हरी लीला' या मोटार टँकरवरील जखमी क्रू मेंबरला सुखरूप बाहेर काढण्यासाठी सोमवारी रात्री उशीरा साधारण ११ वाजेच्या सुमारास हेलिकॉप्टरने उड्डाण घेतले होते. हेलिकॉप्टर हरी लीलाजवळ पोहोचले असतानाच 'इमर्जन्सी हार्ड लँडिंग' करावे लागले.
भारतीय तटरक्षक दलाच्या म्हणण्यानुसार, चार क्रू मेंबर्स असलेल्या अॅडव्हान्स्ड लाइट हेलिकॉप्टर (एएलएच)ला समुद्रात 'इमर्जन्सी हार्ड लँडिंग' करावे लागले आणि या आपत्कालीन परिस्थितीत ते समुद्रात पडले. आपत्कालीन लँडिंगच्या कारणाचा अद्याप शोध घेतला जात आहे. एका क्रू सदस्याला शोधण्यात यश आले आहे, तर उर्वरित तिघांचा शोध सुरू आहे. हेलिकॉप्टरचे लोकेशन सापडले आहे. या बचाव कार्यासाठी, बेपत्ता कर्मचाऱ्यांच्या शोधासाठी ४ जहाजे आणि २ विमाने परिसरात तैनात केली आहेत.
